Нацыянальны статыстычны камітэт Беларусі з 1 студзеня 2016 года ўводзіць міжнародны стандарт СНС-2008, паведамілі ў Белстаце.
Стандарт СНС-2008 распрацаваны пад эгідай Статыстычнай камісіі ААН і ўлічвае апошнія тэндэнцыі сусветнай эканомікі. На СНС-2008 перайшлі краіны ЕС, ЗША, Канада, план па ўкараненні СНС-2008 распрацаваны ў кожнай з краін СНД.
У абноўленым стандарце прадугледжана прынцыпова новая трактоўка шэрага важных эканамічных аперацый. Гэта адлюстраванне расходаў на навукова-даследчую дзейнасць, ваенных расходаў, паслуг фінансавага пасрэдніцтва, паслуг па пражыванні ва ўласным жыллі. Змяненні закрануць усе тры метады разліку ВУП — вытворчы метад, метад выкарыстання даходаў і метад фарміравання ВУП па крыніцах даходаў.
Так, пры разліку ВУП вытворчым метадам зменшыцца прамежкавае спажыванне і павялічыцца валавая дабаўленая вартасць. Пры разліку метадам канчатковага выкарыстання зменшацца расходы на канчатковае спажыванне сектара дзяржкіравання і павялічыцца валавое накапленне асноўнага капіталу. Уплыў гэтага змянення на ВУП у дынаміцы за 3 гады вядзе да росту ВУП у сярэднім на 0,5 працэнта.
СНС-2008 таксама рэкамендуе класіфікаваць сістэмы ўзбраення ў якасці асноўных сродкаў. Расходы на ўзбраенне, тэрмін выкарыстання якіх перавышае 1 год, павінны быць перанесены з прамежкавага спажывання ў валавое накапленне, што прывядзе да павелічэння аб'ёму ВУП.
Паслугі фінансавага пасрэдніцтва, якія вымяраюцца ўскосным чынам (ПФПВУ), раней вылучаліся ў асобны від эканамічнай дзейнасці. Пры разліку ВУП у адпаведнасці з СНС-2008 велічыня ПФПВУ, уключаная ў прамежкавае спажыванне, зменшыцца, што павялічыць ВУП.
Абноўлены падыход да ўліку паслуг па пражыванні ва ўласным жыллі таксама прывядзе да росту ВУП.
Большасць краін, якія ўкаранілі СНС-2008, уключылі незаконную дзейнасць у аб'ём ВУП. Гэта вытворчасць і распаўсюджванне наркотыкаў, прастытуцыя, кантрабанда алкаголю, тытуню. «Асноўнай праблемай для Беларусі пры вывучэнні гэтага напрамку з'яўляецца падбор аб'ектыўных крыніц інфармацыі. Ацэнка, зробленая на аснове даных МУС і экспертных меркаванняў, паказала нязначны аб'ём такой дзейнасці. Таму незаконная дзейнасць не знойдзе адлюстравання ў складзе ВУП», — растлумачылі ў Белстаце.
У адпаведнасці з новымі метадалагічнымі падыходамі абсалютная велічыня ВУП за 2012 год павялічыцца на 3,4 працэнта. Абноўленыя падыходы таксама знойдуць адлюстраванне ў разліках ВРП абласцей і Мінска.
