Усерасійская федэрацыя лёгкай атлетыкі прызнала сваю дыскваліфікацыю, рашэнне аб якой раней прыняла Міжнародная асацыяцыя лёгкаатлетычных федэрацый, і выказала гатоўнасць супрацоўнічаць з IAAF.
Пра гэта гаворыцца ў лісце, што кіраўнік УФЛА Міхаіл Бутаў накіраваў у адрас IAAF, пасяджэнне рады якой праходзіць у чацвер у Манака. Бутаў не бярэ ўдзелу ў пасяджэнні.
«Учора УФЛА даслала заяву, у якой яна выказвае згоду з дыскваліфікацыяй, і не будзе карыстацца правам аспрэчыць яе», — сказана ў прэс-рэлізе Міжнароднай федэрацыі лёгкай атлетыкі.
Ва УФЛА прызналі, што нагода для адхілення расійскіх спартоўцаў ад спаборніцтваў пад эгідай IAAF была. У прыватнасці, гэта можа закрануць удзел зборнай Расіі па лёгкай атлетыцы ў Алімпійскіх гульнях у Рыа-дэ-Жанейра.
Усерасійская федэрацыя мае намер супрацоўнічаць з кіруючым органам сусветнай лёгкай атлетыкі і выконваць рэкамендацыі інспекцыі IAAF, якая пачне працу, як чакаецца, у студзені 2016 года.
Сяброўства УФЛА ў Міжнароднай асацыяцыі было прыпынена 13 лістапада на падставе высноў дакладу Сусветнага антыдопінгавага агенцтва WADA аб сістэматычным ужыванні забароненых прэпаратаў расійскімі лёгкаатлетамі.
