Намесніца міністра гандлю Ірына Наркевіч выступае за большы кантроль сумленнасці ў гандлі. Фота БЕЛТА.
Міністэрства гандлю Беларусі мае намер узмацніць кантроль за дакладнасцю рэкламы. Пра гэта ў чацвер на прэс-канферэнцыі паведаміла намесніца міністра гандлю Ірына Наркевіч, перадае агенцтва БЕЛТА.
«Мінгандлю мае намер узмацніць кантроль за рэкламай, перш за ўсё, за яе верагоднасцю. У першую чаргу гэта тычыцца інфармацыі аб цане і ўласцівасцях тавараў і паслуг», — адзначыла Ірына Наркевіч.
У прыватнасці, яна прывяла факты, калі падчас маштабных распродажаў гандаль, у тым ліку інтэрнэт-крамы, паказваюць завышаны працэнт зніжкі. Пры гэтым намеснік міністра заявіла, што міністэрства мае намер дзейнічаць акуратна і узважана падыходзіць да вырашэння пытанняў аб адказнасці. Стаўка мае быць зроблена на павышэнне прававой пісьменнасці зацікаўленых асоб.
Змяненняў у закон аб рэкламе ў бліжэйшы час уносіць не плануецца. «Цяпер самае галоўнае для бізнэсу — стабільнасць, павінны быць зразумелыя правілы гульні», — падкрэсліла чыноўніца.
