Старшыня Беларускай федэрацыі хакея Ігар Рачкоўскі перакананы, што ў справе арыштаванага былога генеральнага менеджара ХК «Дынама-Мінск» Уладзіміра Беражкова «няма ніякай палітыкі». Пра гэта ён заявіў у інтэрв'ю праграме «Контуры» на тэлеканале АНТ.
Рачкоўскі: «Кропку можа паставіць толькі суд. Тое, што тут няма ніякай палітыкі, ніхто нікаго не хацеў падседзець, я гавару дакладна… Я лічу, што гэтую тэму трэба закрываць для таго, каб усім стала зразумела».
Таксама Рачкоўскі сказаў, што «быў дастаткова сур'ёзны канфлікт паміж галоўным трэнерам і генеральным менеджарам» ХК «Дынама-Мінск», пра што дагэтуль не было вядома.
Як паведамляла Еўрарадыё, былы галоўны рэдактар газеты «Прессбол» і экс-менеджар мінскага «Дынама» Уладзімір Беражкоў знаходзіцца за кратамі са жніўня 2015 года. У яго адносінах распачалі крымінальную справу па артыкуле «крадзеж шляхам злоўжывання службовымі паўнамоцтвамі». У абарону Беражкова напісалі ліст на імя кіраўніка дзяржавы хакеісты «Дынама».
