Прэм'ер-міністр Турцыі Ахмет Давутаглу па выніках саміту ЕС— Турцыя заявіў, што яго краіна і Еўрасаюз будуць праводзіць па два саміты на год, што паскорыць працэс уваходжання Турцыі ў ЕС, перадаюць інфармацыйныя агенцтвы.
«Вызначаны каляндар па пытанні бязвізавага рэжыму з ЕС. У сакавіку (2016) першы даклад, у чэрвені — уступленне ў сілу пагаднення аб вяртанні мігрантаў, і ў кастрычніку — уступленне ў сілу бязвізавага рэжыму. Для гэтага ёсць што рабіць і нам, і Еўрасаюзу», — заявіў Давутаглу.
Еўрасаюз выдзяляе Турцыі €3 млрд на ўладкаванне побыту ўцекачоў з Сірыі.
«Нашай канчатковай мэтай з'яўляецца выкараненне гандлю людзьмі і злачынстваў у дачыненні да ўцекачоў, а таксама памяншэнне колькасці мігрантаў, якія накіроўваюцца ў Еўропу», — заявіў Давутаглу.
Усяго Турцыя прыняла каля 2 млн бежанцаў.
Еўрасаюз гатовы да ўвядзення бязвізавага рэжыму з Турцыяй і аднаўлення перамоў аб яе ўступленні ў ЕС у абмен на дапамогу Анкары спыніць плыню мігрантаў з мусульманскіх краін.
