Суд Лунінецкага раёна 8 снежня вынес прысуд за махлярства 20-гадовай жыхарцы Баранавіцкага раёна, якая нідзе не працуе.
Як паведаміў намеснік пракурора Лунінецкага раёна Андрэй Лукашэвіч, які падтрымліваў дзяржаўнае абвінавачанне па справе, днём 4 кастрычніка ў Лунінцы дзяўчына прыйшла ў дом да 86-гадовага мужчыны. Яна заявіла, што прыехала з Мінска, дзе працуе ў службе па аказанні дапамогі пажылым і інвалідам.
«Сацыяльны работнік» паведаміла аб абмене ў краіне старых грошай на новыя і прапанавала пенсіянеру сваю дапамогу ў абмене. Такім чынам яна завалодала 16 млн рублёў, напісала распіску ад імя выдуманай асобы аб прыёме ў пенсіянера гэтых грошай і паабяцала праз некалькі дзён прынесці купюры новага ўзору.
Праз некалькі хвілін пасля сыходу дзяўчыны пенсіянер і яго жонка западозрылі нядобрае і патэлефанавалі ў міліцыю. 20-гадовую зламысніцу затрымалі па дарозе на вакзал, у яе былі канфіскаваны 16 млн рублёў.
Суд Лунінецкага раёна прызнаў дзяўчыну вінаватай па ч. 1 арт. 209 КК (махлярства) і прыгаварыў да 240 гадзін грамадскіх работ. Суд прыняў да ўвагі, што абвінавачваная раней да крымінальнай адказнасці не прыцягвалася і шчыра раскаялася ў садзеяным. Прыгавор яшчэ не набыў законную моц і можа быць абскарджаны.
Як дапоўніў Лукашэвіч, крымінальная справа разглядалася на выязным пасяджэнні ў Лунінецкім гарадскім Доме культуры. «На судовае пасяджэнне па ініцыятыве пракуратуры былі запрошаны пажылыя жыхары горада. З імі праведзена гутарка аб тым, што трэба быць асцярожнымі, каб не пацярпець ад махлярства», — сказаў Лукашэвіч.
