Адным з пунктаў праграмы стала сустрэча з прэзідэнтам Беларусі і Нацыянальнага алімпійскага камітэта Аляксандрам Лукашэнкам. «Вы для мяне недасягальная велічыня. Я памятаю тыя галы, якія вы забівалі», — прыводзяць словы А.Лукашэнкі афіцыйныя крыніцы.
«Сёння я сустрэўся са сваім кумірам, — зазначыў беларускі кіраўнік. — Я вельмі рады, што вы актыўна дапамагалі нашаму футболу як у фінансавых, так і ў тэхнічных адносінах».
А.Лукашэнка ўручыў М.Плаціні ордэн НАК за ўклад у развіццё беларускага футбола.
У сваю чаргу прэзідэнт УЕФА зазначыў, што яму цяжка прадказваць будучыню, але відавочная «тая вялікая работа, што робіцца нацыянальнай федэрацыяй футбола, дзякуючы якой падтрымліваецца цікавасць да гэтага віду спорту ў Беларусі, найперш з боку моладзі».
«Калі ў вас народзіцца хаця б адзін Пеле — гэтага дастаткова для вялікага поспеху», — лічыць М.Плаціні. На яго думку, у супрацоўніцтва УЕФА і Беларусі цудоўныя перспектывы. «Мы прыбылі, каб арганізаваць падтрымку вашай нацыянальнай футбольнай федэрацыі і вызначыць кірунак работы па развіцці футбола ў Беларусі», — сказаў М.Плаціні.
Увечары 1 красавіка прэзідэнт УЕФА сустрэнецца з дэлегатамі штогадовай справаздачнай канферэнцыі Беларускай федэрацыі футбола і журналістамі.