ДТЗ адбылося сёння каля 12-й гадзіны на трасе паміж населенымі пунктамі Горжычкі-Чэска Скаліцэ. Паводле папярэдняй версіі мясцовай паліцыі, кіроўца не справіўся з кіраваннем на заснежанай слізкай дарозе. У выніку аўтобус перакуліўся.
Тут і ніжэй фота: denik.cz
У аўтобусе ехалі 49 турыстаў — дзеці разам з бацькамі. Беларусы накіроўваліся з Прагі ва Вроцлаў.
У Міністэрстве замежных спраў паведамілі, што ў выніку інцыдэнту шпіталізавана 15 чалавек, двое з іх — у цяжкім стане. Загінулых няма.
«Усім пацярпелым аказваецца медыцынская дапамога. Пасля высвятлення месца шпіталізацыі найбольш пацярпелых да іх выедзе консульскі супрацоўнік пасольства Беларусі ў Чэхіі», — кажуць у МЗС.
Турыстаў з сур'ёзнымі траўмамі ў бальніцы дастаўлялі на верталёце.
Тыя, з кім пасля інцыдэнту усё ў парадку, чакаюць адпраўкі ў Беларусь. Турыстычная кампанія адправіла за імі іншы аўтобус. Пакуль з людзьмі працуюць псіхолагі чэшскага МНС.
«Амбасада Беларусі кантактуе з паліцыяй, падраздзяленнямі МНС, прадстаўнікамі турыстычнай кампаніі. Удакладняюцца спісы пацярпелых», — каментуюць інцыдэнт у МЗС.
