Затрыманых падчас суда над графіцістамі 20 хвілін білі нагамі і аштрафавалі; сярод іх журналіст Tut.by
25 студзеня пачаўся суд па «справе графіцістаў». Журналіст TUT.BY Павел Дабравольскі павінен быў асвятляць падзею. Ён быў затрыманы і збіты.
Перад пачаткам пасяджэння некалькі актывістаў, прысутных у будынку суда, разгарнулі расцяжку з надпісам «Не палітычнаму пераследу» і крычалі: «Мастацтва — не злачынства». Іх гвалтам вывелі з залы суда.
Журналіст TUT.BY знаходзіўся за дзвярыма залы пасяджэння. Убачыўшы, што з залы сілком выводзяць маладых людзей — Паўла Сяргея і Максіма Шыціка, ён пачаў здымаць тое, што адбываецца, на камеру. Яго затрымалі разам з актывістамі.
Як паведамляюць праваабаронцы пазбаўленага рэгістрацыі ПЦ «Вясна», адразу пасля затрымання актывістаў і журналіста пачалі збіваць у суседнім пакоі — гукі збіцця былі чуваць у зале суда. Пасля гэтага іх адвезлі ў РУУС, дзе склалі па два пратаколы: па артыкулах КаАП 24.1 «Непавага да суду» і 23.4 «Непадпарадкаванне законным патрабаванням службовай асобы». Потым затрыманых прывезлі зноў у суд Фрунзенскага раёна, каб прыцягнуць да адміністрацыйнай адказнасці, пры гэтым асабістыя рэчы пакінулі ў РУУС. На хлопцах былі відаць сляды збіцця.
Па словах самога Паўла, у яго канфіскавалі тэлефон, усе звесткі сцерлі. Некалькі супрацоўнікаў АМАП, паведаміў Павел, яго павалілі на падлогу і збівалі нагамі на працягу 20 хвілін. Пры гэтым ён адзначыў, што пры ім быў бэдж журналіста і супрацоўнікі міліцыі гэты дакумент бачылі.
Як паведамляюць праваабаронцы, Максіма Шыціка і Паўла Дабравольскага прысудзілі да штрафу 45 базавых велічынь — 9 450 000 беларускіх рублёў, а Паўла Сяргея да штрафу ў 50 базавых велічынь — 10 500 000. Суддзя — Марыя Ярохіна. У якасці сведкі выступіў супрацоўнік органаў унутраных спраў Сяргей Кавальчук, які, па словах асуджаных, браў удзел у іх збіцці.
Прадстаўнік Фрунзенскага РУУС недаступны для каментароў. Прэс-сакратар ГУУС Мінгарвыканкама Аляксандр Ластоўскі паабяцаў пракаментаваць сітуацыю пазней.
Калега памерлага выкладчыка Шчукіна: Яго кінула жонка з дзецьмі, пачалася дэпрэсія. У выніку звольнілі за прагулы8
Каментары