Сяргей Багдашоў, адзін з самых вядомых злачынцаў, які адшукваўся ў Беларусі і здзейсніў уцёкі з ізалятара ў Жодзіне ў 2009 годзе, прыгавораны ў Расіі да шасці гадоў пазбаўлення волі, паведаміў на прэс-канферэнцыі 27 студзеня пракурор Мінскай вобласці Алег Лаўрухін.
У Беларусі за ўчыненыя злачынствы Багдашоў завочна асуджаны на восем гадоў пазбаўлення волі з канфіскацыяй маёмасці і адбываннем пакарання ў папраўчай калоніі ўзмоцненага рэжыму.
Калі Расія выдасць Багдашова, на чым настойвае беларускі бок, ён пасля адбыцця пакарання ў РФ працягне адбываць пакаранне ў Беларусі.
Ураджэнец Магілёўскай вобласці Сяргей Багдашоў 1978 нараджэння 29 мая 2009 года, знаходзячыся ў камеры ізалятара часовага ўтрымання ў будынку суда Жодзіна, куды быў дастаўлены ў якасці абвінавачанага на судовае пасяджэнне па крымінальнай справе, збіў начальніка ізалятара, прычыніў яму цяжкія цялесныя пашкоджанні, завалодаў табельнай зброяй і ўцёк з-пад варты.
У Смалявіцкім раёне Багдашоў выкраў «Кадылак», на якім паехаў у Расію. Да гэтага ён зарабляў крадзяжамі ювелірных вырабаў, апаратуры і інструмента з катэджаў, а таксама крадзяжом дарагіх іншамарак, за што і быў асуджаны.
Супрацоўнікам міліцыі Багдашоў прызнаўся: пры ўчыненні злачынстваў ім кіраваў «нейкі спартыўны азарт», яму падабалася красці ва ўмовах павышанай рызыкі. Выкрадаць машыны, проста злучаючы драты, нецікава, заяўляў Багдашоў, іншая справа — забрацца ў багаты дом, калі гаспадары спяць, знайсці месца, дзе ляжаць грошы, дакументы, ключы ад аўтамабіля.
Займаючыся злачыннай дзейнасцю, Багдашоў сутыкнуўся з тым, што мала хто замыкае дамы і гаражы на ноч. Так, ва Уздзенскім раёне з чатырох абследаваных гаражоў злачынец свабодна зайшоў у тры.
Злодзей паспяхова «гастраляваў» па Мінскай і Віцебскай абласцях, але, нягледзячы на паталагічнае шанцаванне і асцярожнасць (працаваў у пальчатках, абутак пасля кожнага крадзяжу мяняў), кольца вакол яго сціскалася. За некалькі месяцаў да затрымання Багдашоў быў зафіксаваны камерай вонкавага назірання ва Уздзе, калі знімаў у банкамаце грошы па выкрадзенай картцы.
Яго затрымалі ў верасні 2008 года, на той момант Багдашоў падазраваўся больш як у дзесяці крадзяжах. Пасля аказалася, што іх, толькі даказаных следствам, прыблізна паўсотні. Прычыненая шкода за няпоўныя тры гады (2006—2008) склала амаль мільярд рублёў.
Пасля ўцёкаў Багдашова з жодзінскага суда было ўстаноўлена, што ў Пскоўскай вобласці РФ ён учыніў серыю крадзяжоў з элітных дамоў, а ў кастрычніку 2009-га трапіў у поле зроку праваахоўнікаў у Сестрарэцку (Ленінградская вобласць). Пры затрыманні яму ўдалося ўцячы.
Затрымалі Багдашова, абвешчанага ў міжнародны вышук па лініі Інтэрпола, толькі ў ліпені 2014 года ў Падмаскоўі. У гэтым праваахоўным органам дапамог звычайны плот, за які, сыходзячы ад пераследу, зачапіўся злачынец. Моцна пашкоджаную пры гэтым нагу пазней давялося ампутаваць.
У Беларусі ў дачыненні да Багдашова акрамя крымінальных спраў за крадзяжы былі распачатыя яшчэ дзве справы: на падставе ч. 4 арт. 294 (крадзеж агнястрэльнай зброі, боепрыпасаў або выбуховых рэчываў) і ч. 2 арт. 413 (уцёкі з папраўчай установы, якая выконвае пакаранне ў выглядзе пазбаўлення волі, арыштнага дома або з-пад варты) КК.
У верасні 2009 года судом Барысаўскага раёна быў асуджаны начальнік ізалятара часовага ўтрымання, які канваяваў Багдашова. Начальніку ІЧУ было прызначанае пакаранне ў выглядзе чатырох гадоў абмежавання волі з накіраваннем у папраўчую ўстанову адкрытага тыпу і пазбаўленнем права займаць пэўныя пасады тэрмінам на тры гады.
Начальнік ІЧУ абвінавачваўся на падставе ч. 1 арт. 428 КК (службовая халатнасць). Расследаванне праводзіла пракуратура Жодзіна.
