Статкевіч заклікаў беларусаў далучыцца да несанкцыянаванай акцыі пратэсту прадпрымальнікаў
Хоць Шумчанка адклікаў заяўку на правядзенне мітынгу, іншы завадатар прадпрымальнікаў Макаеў папрасіў гандляроў выйсці на плошчу.
Цяжка сказаць, ці многа ІП адгукнецца на гэты заклік і ці шмат іншых грамадзян гатовыя падтрымаць іх на несанкцыянаваным пратэсце ў працоўны дзень.
Прадпрымальнікі патрабуюць адмены ўказа №222. У той жа час Мікалай Статкевіч ставіць шырэйшыя патрабаванні.
«Заклікаю ўсіх, хто не жадае быць абрабаваным дзеля ўтрымання адным чалавекам улады над краінай, узяць удзел у акцыі 15 лютага», — напісаў Статкевіч у сябе ў фэйсбуку.
«Баючыся за сваю ўладу, [Лукашэнка] не праводзіць эканамічных рэформаў, каб кантраляваць людзей на месцы працы на неэфектыўных дзяржаўных прадпрыемствах. Каб атрымаць падтрымку сваёй неабмежаванай улады з боку Масквы, ён прывязаў Беларусь да расейскай сыравіннай эканомікі. Цяпер, калі сусветная эканоміка і суседнія з намі краіны ЕЗ дэманструюць устойлівы рост, беларуская эканоміка разам з расейскай абрынулася следам за коштам нафты», — піша Статкевіч.
«Прыдумляюцца ўсё новыя падаткі. Растуць цэны паслуг ЖКГ. Акрамя таго, кіраўнік беларускага рэжыму наважыў пазбавіць нас права выбіраць, што нам купляць за ўласныя грошы. Замест танных і якасных тавараў ён хоча прымусіць нас купляць вырабы раскіданай ім беларускай лёгкай прамысловасці, — піша Статкевіч. — Замест скарачэння дзяржаўных выдаткаў на чыноўнікаў і самы вялікі ў свеце штат «праваахоўнікаў», продажу сваіх пышных аўто, самалётаў і палацаў у розных кутках Беларусі, Лукашэнка забірае грошы ў простых грамадзян», — піша палітык.
Статкевіч заявіў, што возьме ўдзелу у акцыі, якую праводзяць некаторыя з лідараў ІП. «Калі вы баіцеся абараняць сваё, то хто гэта зробіць за вас?» — пытаецца ён.
Цяпер чытаюць
Васкрасенскі: Адкрываецца неба — і Алесь Бяляцкі адразу выходзіць13
Каментары