Старшыня пастаяннай камісіі па нацыянальнай бяспецы палаты прадстаўнікоў Валерый Гайдукевіч мяркуе, што СССР дарма выводзіў войска з Афганістана. Пра гэта ён заявіў у праграме «Галоўны эфір» на тэлеканале «Беларусь-1».
«За час пасля Афгана ўся планета пакрылася метастазамі тэрарызма, а ў рэгіёне ідзе вайна. Гэта таму што мы тады войскі ўвялі ці таму што войскі вывелі?» — запытаўся ў яго вядучы.
«Я думаю, напэўна, дарма мы вывелі… Упершыню мы сутыкнуліся з пытаннем тэрарызма менавіта ў Афганістане. А цяпер мы бачым, што робіцца ў свеце», — выказаўся Гайдукевіч.
Перад тым ён заявіў, што ўвод войскаў не быў памылкай. «Адзінае, што не было даведзена да лагічнага канца», — перакананы ён. «У той час амерыканцы таксама хацелі ўвайсці ў Афганістан, каб назіраць за нашым… за савецкай Сібірру», — патлумачыў Гайдукевіч.
Нагадаем, за час афганскай вайны ў баявых дзеяннях прынялі ўдзел больш за 32 тысячы беларусаў. З іх 711 чалавек загінулі.