У доме былога кіраўніка спецслужб ПНР знайшлі пачак з дакументамі агента Валэнсы
Былы прэзідэнт Польшчы Лех Валэнса ўсё-такі быў сакрэтным асведамляльнікам спецслужбаў камуністычнай Польшчы. Гэта вынікае з дакументаў, знойдзеных у доме памерлага мінулай восенню генерала Чэслава Кішчака, які ў часы Польскай Народнай Рэспублікі кіраваў спецслужбамі.
Як паведаміў старшыня Інстытута нацыянальнай памяці Лукаш Камінскі, у доме генерала Кішчака знайшлі пакунак дакументаў з далучаным лістом ад Кішчака, датаваным красавіком 1996 года. У ім генерал паведамляе, што дакументы датычаць сакрэтнага супрацоўніка пад псеўданімам «Болек», пад якім працаваў Лех Валэнса.
Пакунак быў падрыхтаваны для адпраўкі дырэктару Нацыянальнага архіва, але генерал Кішчак так і не даслаў яго.
Дакументы налічваюць 279 старонак і ўтрымліваюць, між іншым, падпісаную Валэнсам згоду на супрацу са спэцслужбамі ПНР і квітанцыю на атрыманне грашовых сум.
Цяпер адбываецца каталагізацыя знойдзеных дакументаў.
Як вынікае з дакументаў, Валэнса быў завербаваны з 1970 да 1976 гадоў. Гэта значыць, за чатыры гады да таго, як ён узначаліў «Салідарнасць».
Раней тыя самыя абвінавачванні Валэнсу ўжо выстаўляліся. Аднак люстрацыйны суд прызнаў, што гэта фальсіфікацыі, а паперы пра супрацоўніцтва былі ў пазнейшы час сфабрыкаваныя спецслужбамі, каб мець магчымасць дыскрэдытаваць апазіцыянера. Новая знаходка, імаверна, прывядзе да паўторнага расследавання.
Цяпер чытаюць
У будынку ГУБАЗіКа ў цэнтры Мінска адкрыюць малую сцэну тэатра Янкі Купалы11
Каментары