Жонка прэзідэнта Турцыі заявіла, што гарэмы ў Асманскай Імперыі былі «адукацыйнымі ўстановамі, у якіх жанчыны праходзілі школу жыцця».
Эміне Эрдаган зрабіла гэтую заяву ў Анкары на ўрачыстым мерапрыемстве, прысвечаным асманскім султанам, паведамляе ВВС.
Яе каментар прагучаў на наступны дзень пасля таго, як прэзідэнт Турцыі Рэджэп Таіп Эрдаган у сваёй прамове з нагоды Міжнароднага жаночага дня заявіў, што жанчына «павінна быць перш за ўсё маці».
Спадарыня Эрдаган адзначыла, што гарэм быў школай для жанчын Атаманскай дынастыі. Паводле турэцкіх СМІ, яна адзначыла: асобныя моманты жыцця жанчын у гарэме могуць служыць «узорам для пераймання».
Паводле яе, наложніцы ў гарэме атрымлівалі адукацыю, іх добра кармілі. Акрамя таго, далёка не ўсе з іх аказвалі султанам інтымныя паслугі. Аднак, зразумела, яны не маглі пакідаць палац па сваім жаданні.
Многія грамадзяне Турцыі абрынуліся на першую ледзі краіны з крытыкай у сацыяльных сетках.
«Тое, што жанчын нечаму вучылі ў гарэме, не азначае, што яны былі школай, — напісаў карыстальнік сацыяльнай сеткі Twitter Газі Каглар, — гэта поўная лухта! У гарэме султана адначасова маглі жыць да 400 наложніц».
«Калі асманскі гарэм быў адукацыйнай установай, дык чаму ўсіх мужчын, якія працавалі там, кастрыравалі?» — пытаецца іншы карыстальнік.
«Тыя, хто хваліць гарэмы, адпраўляе сваіх дачок не куды-небудзь, а ў амерыканскія ўніверсітэты», — іранізуюць ў сетцы, намякаючы на агульнавядомы факт, што абедзве дачкі Эрдагана атрымалі адукацыю ва ўніверсітэце штата Індыяна.
Аднак некаторыя праўрадавыя журналісты паспяшаліся адзначыць, што Эміне Эрдаган цалкам мела рацыю, і жанчыны сапраўды атрымлівалі ў гарэме неблагую адукацыю.
У 2014 годзе Эрдаган выклікаў хвалю абурэння, заявіўшы, што «жанчыны і мужчыны не роўныя».
