Абсалютным лідарам у Беларусі па пракаце мультфільмаў за ўсе часы стала стужка «Звераполіс». У свеце ён таксама мае немалы поспех, яшчэ ніводная анімацыя «Дыснэя» не стартавала настолькі добра.
Сюжэт мультфільма просты. Звераполіс — гэта ідэальны горад у жывёльным свеце, дзе разам ужываюцца прадстаўнікі ўсіх відаў. Тыя, хто звыкся да пустыні, і тыя, хто любіць Арктыку, жырафы і буразубкі, траваедныя і драпежнікі. Звяры жывуць у згодзе, а горад квітнее.
Трусіха Джудзі Хоўп з невялікага гарадка Малыя Норкі з дзяцінства марыць стаць паліцыянтам, але да яе яшчэ ніводны трус не станавіўся дэтэктывам паліцыі. Гэта праца для буйных жывёл — быкоў, ільвоў, кракадзілаў. З першых дзён у паліцыі Джудзі сутыкаецца з дыскрымінацыяй. Замест расследавання сур’ёзных злачынстваў яе адпраўляць штрафаваць кіроўцаў за няправільную паркоўку.
Аднак у выніку Джудзі ўдаецца атрымаць сапраўды цікавую справу, якая будзе мець нечаканыя наступствы. У расследаванні ёй дапамагае дробны жулік, ліс Нік Уайльд. На лісіц у Звераполісе ўвогуле глядзяць як на цалкам страчаных для грамадства элементаў. Бо ўсе лісы — манюкі, махляры і шарлатаны. Ніводзін нармальны звер не будзе мець справы з лісам.
Амерыканскія мульцікі апошніх гадоў не проста расказваюць цікавую, яркую гісторыю, але вучаць дзяцей базавым прынцыпам дэмакратыі і правоў чалавека.
«Звераполіс» вучыць, што кожны, незалежна ад росту, сілы, полу, месца нараджэння, можа дасягаць поспехаў у любой сферы. Хоць асяроддзе можа варожа ставіцца да такіх ініцыятыў.
А яшчэ «Звераполіс» паказвае, што прадстаўнікоў адной групы нельга судзіць толькі за іх паходжанне. Цікавая сцэна, калі траваедныя жыхары Звераполіса дрыжаць у метро, калі побач з імі едзе драпежнік. Шмат у чым нагадвае істэрыю вакол мусульман.
Дарэчы, галоўным злодзеем у мульціку аказваецца не нехта з ікламі і кіпцюрамі, а той, у каго самая белая і пухнатая поўсць.
Але дзецям зусім не абавязкова бачыць у мультфільме гэтыя алюзіі з сённяшнім часам, ён проста зачэпіць захапляльным сюжэтам. «Звераполіс» будзе даспадобы ўсім: і дзецям, і дарослым.
