На сайце адзінага дзяржаўнага рэестра юрыдычных асоб РФ з'явіўся запіс аб ліквідацыі па рашэнні суда руху актывістаў «СтопХам», які змагаўся з няправільнай паркоўкай.
У гутарцы з выданнем Fontanka.ru прадстаўнік міністэрства юстыцыі Расіі пацвердзіў, што арганізацыя пазбаўленая статусу юрыдычнай асобы.
Па словах прадстаўніка мінюста, пры інспекцыі ў працы руху былі выяўленыя «неаднаразовыя грубыя парушэнні заканадаўства».
Лідар руху, член Грамадскай палаты Расіі Дзмітрый Чугуноў у гутарцы з выданнем сказаў, што не ведае пра закрыццё.
Прэс-сакратар «СтопХама» Дзмітрый Баглоўскі ў гутарцы з «Радыё Балтыка» сказаў, што актывісты будуць працягваць сваю дзейнасць.
«Нашу арганізацыю ніхто не закрываў. Людзі як былі актывістамі і выходзілі на вуліцу, так і працягнуць. Мы ж проста выходзім і робім заўвагі за хамства», — сказаў Баглоўскі.
За амаль шэсць гадоў свайго існавання рух «Стоп Хам», чые актывісты расклейвалі на лабавыя шыбы машын налепкі «Мне пляваць на ўсіх — я паркуюся, дзе хачу», набыло скандальную вядомасць.
Канал «СтопХам» на YouTube ужо блакавалі; у цяперашнім выглядзе ён існуе з мая 2012 года, у яго больш за 700 тысяч падпісчыкаў і больш за 80 млн праглядаў.
