На якія грошы могуць сёння разлічваць суіскальнікі?
Сталіца: айцішнікі, дырэктары, менеджары
Наперадзе па заробках, як звычайна, айцішнікі. Прычым, у адрозненні ад іншых вакансій, тут заробак пазначаюць менавіта ў валюце, бо часцей за ўсё ён прывязаны да даляра і ваганні беларускага рубля на яго не ўплываюць. «Крэатыўны і матываваны прадукт-менеджар» можа разлічваць на зарплату ад 2 да 5 тысяч даляраў. Супрацоўніка шукае кампанія, якая займаецца распрацоўкай мабільных дадаткаў.
Ад 1,5 да 4 тысяч даляраў прапануюць распрацоўшчыкам праграмнага забеспячэння. У кампанію, якая распрацоўвае мабільныя гульні і дадаткі спецыяліста па прыцягненню карыстальнікаў шукаюць на заробак ад 1,2 да 3,5 тысяч даляраў. Акрамя грошай, працадаўцы абяцаюць супрацоўніку курсы англійскай мовы і тэхніку ад «Эпл».
Увогуле, вакансій праграміста ці распрацоўшчыка хапае. Заробак абяцаюць для Беларусі вельмі добры, як правіла – да 3-3,5 тысяч долараў. Пры гэтым, ніжняя планка розная: хтосьці прапануе ад 1 тысячы, хтосьці – ад 2,5.
Калі вам бліжэй не бяздушныя камп’ютары, а жывыя людзі, то можна паспрабаваць сябе на пасадзе менеджара. Напрыклад, у кампанію, якая займаецца продажам кармоў, патрабуецца «менеджар, які ў перспектыве стане кіраўніком». Прапануюць ад 25 мільёнаў рублёў. Кандыдату трэба адпавядаць наступным крытэрам:
«Ідэальны перамоўшчык. Валодае дарам пераканання. Усё ведае, умее, нават калі не ўмее, знойдзе таго, хто ўмее. НЕ скуголіць, НЕ плача. Нізкі маральны парог. Аналітычны склад розуму. Слоў: не хачу, не буду, не ведаю, мне лянота, заўтра НЕ ВЕДАЕ. Адказны. Камунікабельны. Знаходлівы».
Што такое «нізкі маральны парог» не ўдакладняецца, так што глядзіце самі.
Увогуле, вакансій менеджараў па продажах вельмі многа. Але, як правіла, зарплата ў іх не фіксаваная і залежыць ад заробленага.
Неблагія заробкі і ў кіраўнікоў прадпрыемстваў. ЗАТ «Чайна Мерчантс СиЭйчЭн-Бі Эл Ар Камерцыйная і Лагістычная Кампанія» шукае сабе гендырэктара. Калі чалавек ведае кітайскую і англійскую і мае досвед кіраўніцтва кітайскай арганізацыяй або прадстаўніцтвам ў РБ – можа разлічваць на 60 мільёнаў.
Дырэктару, які мае досвед працы ў сферы кансалтынгу па тэхналогіях ідэнтыфікацыі і доглядзе за жывёламі не менш за 15 гадоў, свабодна валодае англійскай, польскай і нямецкай прапануюць 46 мільёнаў. Кіраўнік прадпрыемства, якое займаецца закупкай і пераапрацоўкай грыбоў і ягад, можа разлічваць на 21 мільён рублёў.
Добрыя заробкі ў прыватных медыцынскіх установах. Дарэчы, шмат дзе патрабуюцца стаматолагі. Загадчыку стаматалагічнага аддзялення прапануюць ад 15 да 30 мільёнаў. «Звычайнаму» стаматолагу – 20 мільёнаў. Для параўнання – стаматолагу дзяржаўнай паліклінікі абяцаюць усяго толькі ад 6 да 9 мільёнаў.
На неблагія грошы можа разлічваць рознарабочы-будаўнік, які павінен быць і столярам, і цясляром, і страхаром… Праўда, зарабіць такі спецыяліст шырокага профілю можа нармальна – яму прапануюць 20 мільёнаў рублёў плюс, калі працаваць будзе вахтавым метадам, прадаставяць жытло. Бетоншчык можа разлічваць на 10 мільёнаў. А супрацоўнік, чыя пасада пазначана проста як «будаўнік», звычайна можа зарабіць ад 5 да 10 мільёнаў рублёў.
Невысокія заробкі ў настаўнікаў. Напрыклад, у звычайнай школе настаўнікам хіміі і настаўнікам пачатковых класаў прапануюць ад 4 мільёнаў. Для параўнання: прыёмшчык у сетку пракату ровараў можа атрымаць 4,5 мільёны, без усякай адукацыі. Яшчэ і бясплатна карыстацца роварам.
У рэгіёнах: дэфектолаг зарабляе як прыбіральшчыца
У абласцях прапануюць зусім іншыя грошы. Напрыклад, зарплата доктара нярэдка ўдвая меншая, чым у Мінску, недзе ўвогуле даходзіць да абсурду. Так, напрыклад, ёсць вакансія доктара-акушэра-гінеколага у гомельскай паліклініцы. Зарплата – 2,3 мільёна. Столькі ж абяцаюць настаўнікам-дэфектолагам у раённых гарадах. Для параўнання: ад 2-2,5 мільёнаў рублёў у Віцебску і Гомелі прапануюць таксама качагарам ці прыбіральшчыцам (а ў мінскіх клінінгавых кампаніях прыбіральшчыцам прапануюць увогуле ад 4,2 мільёнаў).
У рэгіёнах вакансій дырэктароў ужо не так шмат, ды і зарплаты меншыя. Тут прасцей уладкавацца вадзіцелем-міжнароднікам (ад 20 да 40 мільёнаў) ці ізноў жа праграмістам (звычайна прапануюць да 2 тысяч долараў ці еўра). Як і ў Мінску шмат хто шукае менеджараў па продажах.
У Гродне, напрыклад, можна ўладкавацца пілотам для правядзення авіяцыйна-хімічных работ у сельскай гаспадарцы. Заробак так сабе – ад 3,6 да 5,7 мільёнаў.
Акцёры, акрабаты, клоуны
Няпроста зарабіць на жыццё і творчым людзям. Вакансій для актораў ці артыстаў хапае, вось толькі зарплата зусім не вялікая. Артыст драмы ў Гомелі можа разлічваць на 2,5 мільёны (што цікава, ў Мазыры – на 3,2), артыст балета ў Гродне – на 2,8 мільёна, клоун ці акрабат у Мінску – на 2,6 мільёна.
Калі вы вырашылі стаць спеваком у хоры, то таксама на вялікія грошы не разлічвайце. Нацыянальная Дзяржаўная Тэлерадыёкампанія шукае сабе артыста хора на зарплату ў 2,5 мільёна. У Гомелі і ў Гродне можна ўладкавацца на пасаду кіраўніка хора ветэранаў. Заробак – 2,3 мільёна рублёў.
Каментары