Прессбол
Былы генеральны менеджар хакейнага клуба «Дынама» (Мінск) Уладзімір Беражкоў, які выйшаў на волю пад падпіску аб нявыездзе, разлічвае, што яго справа не дойдзе да суда, і заяўляе, што не мае намеру вяртацца ў журналістыку.
Паведамленні аб тым, што суда не будзе, не адпавядаюць рэчаіснасці, заявіў БелаПАН Беражкоў.
«Мая справа яшчэ ў стадыі рашэння, трэба прайсці пэўны шлях і выканаць пэўныя ўмовы, каб справа магла вырашыцца па сутнасці і магла быць закрытая, каб суд сапраўды не адбыўся. Гэта — мэта, але да яе яшчэ трэба прыйсці. А што можа здарыцца заўтра — як паказвае сітуацыя, гэта непрадказальна», — сказаў ён.
Паводле слоў Беражкова, які з 1995-га па 2014 гады быў галоўным рэдактарам спартыўнай газеты «Прессбол», у журналістыку ён вяртацца не збіраецца, хоць ужо атрымаў прапанову ад былых калег. У той жа час былы топ-менеджар «Дынама» не выключыў, што калі-небудзь напіша кнігу пра дзень свайго арышту.
Галоўнай задачай у СІЗА Беражкоў лічыў захаванне здароўя, у тым ліку інтэлектуальнага: «Я разумеў адказнасць, якая на мне ўсё адно застаецца… Мне трэба было выхоўваць непаўналетніх дзяцей, мне трэба было, каб мая састарэлая мама, іншыя сваякі і сябры, якія за мяне вельмі перажывалі, атрымалі не кавалак расліны ці мяса, які трэба даглядаць, а паўнавартаснага чалавека, які быў бы яшчэ здольны дапамагаць ім».
Паводле слоў Беражкова, тых, хто не заслугоўвае поціску рукі, ён пераследаваць не збіраецца.
«Я ўвогуле шмат у чым пераацаніў сваё стаўленне да людзей і да жыцця. Прыйшоў да таго, што трэба больш дараваць, — адзначыў ён. — Чалавек сам па сабе як істота мае патрэбу ў спагадзе і выхаванні, а злосцю яго не выправіць. Злосць нямоглая ў гэтым плане. Таму я, шчыра кажучы, не ведаю яшчэ, як буду сустракацца і размаўляць з нерукапаціснутымі людзьмі, але дакладна ведаю, што ім не буду помсціць, што не буду рабіць супраць іх ніякіх дзеянняў, якія, скажам так, дрэнна паўплывалі б на іх здароўе, дзелавую і іншую рэпутацыю».
Глядзі таксама: Уладзімір Беражкоў. Забіў у сабе журналіста, але захаваў чалавека
***
Топ-менеджары ХК «Дынама» Максім Суботкін і Уладзімір Беражкоў былі затрыманыя летам 2015 года. У канцы ліпеня паводле абвінавачання ў злоўжыванні службовымі паўнамоцтвамі, што пацягнула цяжкія наступствы ў выглядзе нанясення ўрону ў асабліва буйным памеры, затрымалі Суботкіна, які застаецца пад арыштам. У жніўні быў затрыманы Беражкоў — яму выставілі абвінавачанне ў завалоданні грашовымі сродкамі клуба на 1 млрд. 90 млн. рублёў з выкарыстаннем службовых паўнамоцтваў (ч. 4 арт. 210 КК).
1 лютага Следчы камітэт паведаміў аб завяршэнні расследавання крымінальнай справы ў дачыненні да Беражкова і Суботкіна, а таксама пра тое, што яны кампенсавалі амаль 3 млрд. рублёў шкоды і папрасілі вызваліць іх ад крымінальнай адказнасці.
5 лютага старшыня СК Іван Наскевіч заявіў журналістам, што Беражкоў і Суботкін могуць быць памілаваныя, бо кампенсавалі нанесеную шкоду. Пры гэтым Наскевіч падкрэсліў, што з такім хадайніцтвам Беражкоў і Суботкін звярнуліся да Аляксандра Лукашэнкі. «Сказаць за кіраўніка дзяржавы, якое будзе рашэнне, я не бяруся, таму і пра судовую перспектыву казаць таксама заўчасна. Магчыма, яе і не будзе, калі іх прашэнне будзе задаволенае», — сказаў кіраўнік СК.
