Мінгарвыканкам павялічыў тарыфы на ваду і каналізацыю для тых, хто аплачвае гэтыя паслугі па тарыфах, якія забяспечваюць поўнае пакрыццё эканамічна абгрунтаваных выдаткаў. Адпаведнае рашэнне апублікавана на Нацыянальным прававым інтэрнэт-партале.
Дакумент прадугледжвае ўнясенне змяненняў у рашэнне мэрыі ад 27 лютага 2014 года. Ім вызначаюцца менавіта поўныя тарыфы на паслугі ЖКГ для мінчан.
Як змяніліся «поўныя» тарыфы на ваду і каналізацыю
паслуга, адзінка вымярэння | было, у рублях | стала, у рублях |
водазабеспячэнне, куб. м. | 5400 | 6875 |
водаадвядзенне, куб. м. | 3600 | 4530 |
Адзначым, што льготныя тарыфы, якія былі ўведзеныя ўказам прэзідэнта №107 ад 23 сакавіка, не змяніліся і складаюць 2790 рублёў (за ваду) і 1 863 рублі (за каналізацыю).
Пра тое, што ў Мінску будзе павялічаны поўны тарыф на ваду, чыноўнікі папярэджвалі яшчэ ў канцы лютага.
У выніку агульны кошт паслугі «вада-каналізацыя» ў жыроўцы вырасце з 9 тысяч рублёў да 11,4 тысячы рублёў за кубічны метр. Эканамічна абгрунтаваны тарыф на ваду ў Мінску быў самым нізкім у параўнанні з іншымі абласнымі цэнтрамі і рэгіёнамі краіны. Напрыклад, у Мінскай вобласці ён павялічаны да 15 141 рубля з 19 лютага 2016 года.
Плаціць па поўным тарыфе павінны тыя, хто спажывае больш за 140 літраў вады ў суткі на аднаго пражываючага ў кватэры. Прычым толькі за тыя літры, якія выйшлі за норму. Але гэта пры ўмове, што ў доме ёсць індывідуальныя прыборы ўліку расходу вады. Калі лічыльнікаў няма, то жыхары павінны аплачваць па высокім тарыфе ўсю ваду. Гэтая норма не тычыцца толькі тых, хто жыве ў кватэрах, дзе ўстаноўка такіх прыбораў эканамічна немэтазгодна або тэхнічна немагчыма.