globo.com
Пасяджэнне ніжняй палаты парламента Бразіліі павінна пачацца а 20.00 (паводле мінскага часу). Каб пытанне аб імпічменце трапіла на разгляд сената (верхняй палаты), у ніжняй палаце за яго павінны прагаласаваць 342 дэпутаты — дзве траціны чальцоў ніжняй палаты парламента.
Па ўсёй Бразіліі ў нядзелю чакаюцца вялікія дэманстрацыі. Сотні ўзброеных паліцэйскіх спадзяюцца прадухіліць сутыкненні ў сталіцы краіны, горадзе Бразіліа, дзе прыхільнікаў і праціўнікаў прэзідэнта Русеф падзялілі двухметровай агароджай.
Прэзідэнта Дылму Русеф абвінавачваюць ва ўтойванні рэальнага дэфіцыту бюджэту краіны.
Сама Русеф абвінавачвае сваіх палітычных праціўнікаў у змове з мэтай дзяржаўнага перавароту, паведамляе Бі-бі-сі.
Цікава, што працэдура імпічменту не так ужо і часта ў сусветнай практыцы даходзіць да канца.
Так, у ЗША да імпічменту былі прадстаўленыя прэзідэнты Эндру Джонсан (1869) і Біл Клінтан (1999), але Сенат у выніку апраўдаў іх. Рашэнне не набрала 2/3 галасоў.
У Еўропе ці не адзіны выпадак імпічменту быў у дачыненні да прэзідэнта Літвы Раландаса Паксаса (2004).
А вось у Бразіліі такі прэцэдэнт ужо быў: у 1992 г. Фернанду Калор падаў у адстаўку, пасля таго як парламент прыняў пастанову ад імпічменце
