Памёр музычны крытык Вітаўт Мартыненка, яму было 56 гадоў. У 1980-я ён першым пачаў раскручваць беларускамоўны рок
Ён адышоў пасьля шматгадовага змаганьня з цукровым дыябэтам.
Як паведаміў Анатоль Мяльгуй, яго сябра і калега памёр сёньня, 17 красавіка. У Вітаўта Мартыненкі засталася 25-гадовая дачка Альдона.
«Вельмі цяжка ўсьведамляць, што няма чалавека, зь якім я сябрую ўжо больш за 30 год… Найперш Вітаўта ведаюць як выдатнага музычнага крытыка, але ён таксама таленавіта журналіст і паэт, які пісаў вершы для беларускіх гуртоў. Гэта быў вельмі крэатыўны чалавек, які ставіў перад сабой вельмі розныя задачы. Напрыклад, ён адстойваў, каб у беларускай мовы адрозьнівалася напісаньне выбухнога і фрыкатыўнага «г». А яго марай было ўвядзеньне асобных літар для абазначэньня гукаў «дж» і «дз». Але гэта, відаць, так і застанецца яго марай.
Сышоў сапраўдны архіварыюс беларускай незалежнай музыкі. Пасьля яго застаўся вялізны архіў артыкулаў як яго аўтарства, так і іншых музычных крытыкаў — ён усё гэта зьбіраў. Таксама ў яго грунтоўная калекцыя вінілаў. Шкада, калі гэта прападзе. Гэта ўнікальны здабытак у беларускай музычнай культуры», — сказаў Анатоль Мяльгуй.
Вітаўт Мартыненка нарадзіўся 29 верасьня 1959 году ў Менску. Скончыў Беларускі дзяржаўны ўнівэрсытэт, факультэт журналістыкі.
З 1983 да 1994 працаваў карэспандэнтам, адказным сакратаром, намесьнікам галоўнага рэдактара моладзевай ґазэты «Чырвоная змена», рэдагаваў музычную рубрыку «Мелодыя» (з 1986 — «Нотны аркуш»). З 1989 да 1995 быў карэспандэнтам мюнхэнскай рэдакцыі радыё «Свабода», арґанізаваў там і праводзіў беларускі музычны гіт-парад. З 1994 да 1997 працаваў намесьнікам галоўнага рэдактара штотыднёвіка «Кинонеделя Минска».
У 1985 разам зь сябрам і музычным крытыкам Анатолем Мяльгуем быў сярод стваральнікаў незалежнага музычнага рок-клюбу «Няміга», які ў 1987-м стаў калектыўным сябрам каардынацыйнай рады моладзевых нефармальных суполак. У канцы 1980-х — удзельнік «Талакі», «Тутэйшых».
У 1988 стварыў у камсамольскай ґазэце «Чырвоная змена» адну зь першых груп падтрымкі БНФ.
Аўтар музыказнаўчых кніг «Праз рок-прызму» (1989, New York, разам з А. Мяльгуем), «222 альбомы беларускага року і ня толькі» (2006, Менск, разам з А. Мяльгуем), «Rock on-line» (2010, Менск).
Выдаў таксама ў сваёй рэдакцыі з прадмовай і камэнтарамі беларускі пераклад раману Генрыка Сянкевіча «Quo Vadis» (2002) і асобным выданьнем поўны тэкст названай прадмовы — «Свой сярод чужых (кантэксты, гістарычныя і лінґвістычныя асаблівасці беларускага перакладу ксяндза П. Татарыновіча)» (2003).
* * *
Інфармацыя адносна развітання з Вітаўтам Мартыненка:
19 красавіка а 9.45 з морга 10-й бальніцы (вул. Убарэвіча, 73) цела Вітаўта павязуць у крэматорый на Паўночных могілках (пас. Навінкі) дзе а 11.00 адбудзецца развітанне.
Калі хто не мае, як даехаць да крэматорыя будзе транспарт ад 10-й бальніцы а 9.45.
Дадатковая інфармацыя: 8 044 7257064 Альдона
Каментары