Міністэрства сувязі і інфарматызацыі Беларусі і карпарацыя Microsoft падпісалі мемарандум аб узаемаразуменні, паведаміў сёння журналістам міністр сувязі і інфарматызацыі Сяргей Папкоў перад пачаткам цырымоніі адкрыцця міжнароднага спецыялізаванага форуму па тэлекамунікацыях, інфармацыйных і банкаўскіх тэхналогіях «ТІБО-2016».
«Мы падпісалі мемарандум аб тым, што абодва бакі будуць імкнуцца садзейнічаць адзін аднаму ў развіцці бізнэсу. На сённяшні момант дакумент з'яўляецца першым крокам у супрацоўніцтве паміж урадам і кампаніяй Microsoft па рэалізацыі розных праектаў у галіне IT-тэхналогій», — адзначыў Сяргей Папкоў. У прыватнасці, Microsoft можа ўзяць удзел у праекце па стварэнні ў Беларусі лічбавай эканомікі.
Таксама Сяргей Папкоў распавёў, што абмяркоўваецца кошт праграмных прадуктаў Microsoft для Беларусі.
У сваю чаргу першы намеснік міністра сувязі і інфарматызацыі Дзмітрый Шадко нагадаў, што ў рамках Сусветнай гандлёвай арганізацыі вялікі комплекс пытанняў звязаны з правамі на інтэлектуальную ўласнасць, у тым ліку на праграмнае забеспячэнне.
«І тут Microsoft — адзін з ключавых гульцоў на рынку. Не адзіны, з якім мы вядзём перамовы, але ключавы. Мы якраз вядзём размову пра тое, каб нацыянальныя інтарэсы краіны былі ўзгодненыя з міжнароднымі прынцыпамі вяршэнства абароны інтэлектуальнай уласнасці, але каб гэтая інтэлектуальная ўласнасць абыходзілася не так дорага, як можа абыходзіцца, калі кіравацца стандартным прайс-лістом. Па сутнасці, мы прапануем прыняць да ўвагі нацыянальныя асаблівасці, патрэбы сістэмы адукацыі, аховы здароўя і прапанаваць нам умовы, якія б былі выгаднымі», — растлумачыў ён.
Выстава «ТІБО-2016» пройдзе ў Мінску 19-22 красавіка. Удзел у ёй плануюць узяць больш за 100 кампаній з 18 краін (Беларусь, Расія, Украіна, Казахстан, Азербайджан, Літва, Латвія, Польшча, Чэхія, Германія, Фінляндыя, Швецыя, Вялікабрытанія, Турцыя, Кітай, Рэспубліка Карэя, Японія, ЗША).
