Гвінейскі заліў стаў самым небяспечным месцам на Зямлі для мараплаўцаў з-за ўзрослай актыўнасці піратаў і ўжыванага імі гвалту, сведчыць даклад амерыканскай арганізацыі Oceans Beyond Piracy.
Як гаворыцца ў дакладзе, раней піраты пераважна імкнуліся захопліваць нафтавыя танкеры з-за іх грузу, але з падзеннем цэнаў на нафту яны пераключыліся на выкраданне людзей дзеля выкупу.
Гвінейскі заліў Атлантычнага акіяна абмывае такія краіны, як Кот-д'Івуар, Гана, Тога, Бенін, Нігерыя і Камерун.
Самалійскія піраты ля ўсходняга берага Афрыкі, тым часам, ужо не ўяўляюць такой пагрозы, як раней, дзякуючы міжнароднай аперацыі ваенна-марскіх сіл.
У 2015 годзе самалійскія піраты не захапілі ніводнага камерцыйнага судна.
Як у канцы красавіка паведамляла Міжнароднае марское бюро, з пачатку года ля берагоў Заходняй Афрыкі 44 мараплаўцы сталі ахвярамі выкраданняў.
Пры гэтым у цэлым у свеце ўзровень пірацтва зніжаецца: за першы квартал 2016 года было зарэгістравана 37 выпадкаў пірацтва і ўзброенага рабавання, тады як у мінулым годзе за той жа перыяд адбыліся 54 такія інцыдэнты.