Алея шляхты закладзеная на тэрыторыі Лошыцкага сядзібна-паркавага комплексу ў Мінску. Пра гэта паведаміў старшыня ГА «Мінскі сход нашчадкаў шляхты і дваранства» Ігар Чакалаў-Шыдлоўскі.
Грамадскае аб'яднанне выступіла ініцыятарам і выканаўцам праекта, яго аўтарам — галоўны архітэктар праектаў майстэрні ландшафтнай архітэктуры РУП «Мінскпраект» Ганна Аксёнава.
Па словах Ігара Чакалава-Шыдлоўскага, канцэпцыя алеі будзе рэалізаваная паэтапна. У Лошыцкім комплексе сябры Мінскага сходу нашчадкаў шляхты і дваранства пры ўдзеле духавенства і пры садзейнічанні УП «Мінскзеленбуд» высадзілі 17 рабін (сімвалізуюць пяшчоту і адданасць дам) і 3 дубы (сіла і магутнасць рыцараў). Рабіны пасаджаныя вянком, у цэнтры — тры дубы. «У планах — другі вянок, дарожкі, устаноўка памятнага каменя», — сказаў суразмоўца.
Алея закладзеная ў памяць пра прадстаўнікоў шляхецкіх родаў, якія аддалі свае жыцці ў вялікіх бітвах. «Наша арганізацыя створаная людзьмі, якія цікавяцца гістарычнай спадчынай краіны, яе гераічным мінулым. Любоў да Бацькаўшчыны, павага да культуры і цікавасць да гісторыі — вось галоўныя пастулаты, якімі кіруецца ў сваёй дзейнасці наш сход», — дадаў Ігар Чакалаў-Шыдлоўскі.
Як паведамляе Радыё Свабода, да ідэі алеі шляхты са здзіўленнем паставіўся канцлер Згуртавання беларускай шляхты, ён жа маршалак Мінскі, Аляксандр Шымбалёў:
«Я не ведаю, што гэта такое, алея шляхты, і навошта яна патрэбная. У дзяржаве, якая рэпрэсавала шляхту і да гэтага часу шальмуе ўсякую ідэю шляхты… Пачытайце гістарычныя падручнікі, пачытайце навуковыя працы, якія цяпер выходзяць — да гэтага часу ўсе, звязанае са шляхтай і арыстакратыяй, гэта варожае, гэта выходзіць за ідэалогію дзяржавы».
Шымбалёў кажа, што Згуртаванне і само не супрацоўнічае са Сходам, і іншым не рэкамендуе: маўляў, гэта «камерцыйны праект», які «выдае за грошы дыпломы, калі прозвішча сугучнае шляхецкаму» і «да шляхты не мае дачынення». Само ж Згуртаванне нават не спрабавала прапаноўваць ініцыятывы, падобныя да алеі шляхты:
«Не было такіх прапаноў, ніколі мы да дзяржавы не звярталіся. Згуртаванне беларускай шляхты займаецца радаводамі справамі, навуковымі, гістарычнымі. Папулізмам мы не займаемся».
