14 мая Віцебская дыяцэзія Рымска-Каталіцкай царквы і ДАІ правялі сумесную прафілактычную акцыю для матацыклістаў. Акцыю «З Богам па дарогах» ініцыяваў пробашч кафедральнага касцёла ксёндз Андрэй Аніскевіч. Удзел у ёй узялі некалькі дзясяткаў матацыклістаў, піша Еўрарадыё са спасылкай на katolik-gomel.by.
katolik-gomel.by
Мотакалона праехала ад гандлёвага цэнтра «Карона» практычна праз увесь Віцебск да кафедральнага касцёла Езуса Міласэрнага. Тут біскуп Алег Буткевіч сказаў для байкераў прывітальнае слова, блаславіў іх на пачатак сезону і акрапіў свянцонай вадой. Матацыклісты таксама пачулі выдатныя спевы ў суправаджэнні аргана — «Магутны Божа», «Авэ, Марыя», «Малітва» Булата Акуджавы. Пасля настаяцель асвяціў байкі і запрасіў матацыклістаў на гарбату.
Айцец Андрэй Аніскевіч сам з'яўляецца байкерам ўжо 23 гады. У калоне байкераў ён праехаў на сваёй «Хондзе». Ён рады, што першая спроба ўдалася, і плануе на завяршэнне мотасезона яшчэ больш масавае байкерскае мерапрыемства.
