17 мая у Брэсцкім абласным краязнаўчым музеі прайшла імпрэза пад назвай «Ок, Google: СССР?».
Мерапрыемства было праведзена ў межах «Ночы музеяў». Сцены музея аздобілі савецкімі агітацыйнымі плакатамі, а гасцей сустракалі дружыннікі.
Фота: Таццяна Мухароўская, virtualbrest.by
У дзіцячай арт-зоне паказвалі савецкія мультфільмы, праводзілі майстар-клас па вырабе караблікаў з паперы. Дарослым прапаноўвалі згуляць у шашкі і даміно. Таксама можна было здаць макулатуру і атрымаць за гэта кнігу. Працаваў і цырульнік, які рабіў усім ахвотным прычоскі ў стылі 60-70-х гадоў.
Фота: Таццяна Мухароўская, virtualbrest.by
Па музейных залах маршыраваў піянерскі атрад, які спяваў піянерскія песні і скандаваў лозунгі, накшталт «Будзь гатовы — заўсёды гатовы».
Фота: Таццяна Мухароўская, virtualbrest.by
«У гэтым годзе круглая дата распада Савецкага Саюза і мы вырашылі трохі аб ім узгадаць. Узгадаць у культурна-побытавым плане, без палітыкі. Хацелі паказаць некаторыя элементы і аспекты жыцця савецкага чалавека 1960-70-х гадоў»,— паведаміў «Нашай Ніве» Аляксей Міцюкоў, дырэктар Брэсцкага абласнога краязнаўчага музея.
На пытанне, ці не з’яўляюцца палітыкай піянеры, ён адказаў так:
«Я і сам быў піянерам. Нічога дрэннага ў гэтым не бачу».
Ноч музеяў — міжнародная акцыя, прымеркаваная да Міжнароднага дня музеяў, падчас якой можна агледзець музейныя экспазіцыі ноччу. У гэтую ноч многія музеі адкрыты для наведвальнікаў пасля заходу сонца і амаль да раніцы. Асноўная мэта акцыі - паказаць рэсурс, магчымасці, патэнцыял сучасных музеяў, прыцягнуць у музеі моладзь.
Упершыню «Ноч музеяў» была праведзена ў Берліне ў 1997. Міжнародны дзень музеяў — штогадовае свята, якое адзначаецца 18 мая.
