president.gov.by
Як было адзначана ў часе сустрэчы, у развіцці шматбаковага ўзаемавыгаднага супрацоўніцтва зацікаўлены як Беларусь, так і Італія, паведаміла па выніках сустрэчы прэс-сакратар кіраўніка беларускай дзяржавы Наталля Эйсмант дзяржаўнаму агенцтву БЕЛТА.
Аляксандр Лукашэнка выступіў з прапановай аб магчымасці стварэння бізнес-савета Беларусі і Італіі. На яго думку, такі савет дапамог бы зняць многія пытанні ва ўзаемадзеянні бізнес-структур. Прэзідэнт Італіі ў сваю чаргу падтрымаў гэту ідэю, адзначыўшы, што гэта быў бы выдатны інструмент для садзейнічання супрацоўніцтву ў сферы бізнесу і вырашэнні розных пытанняў.
Абмяркоўваліся таксама магчымасці павелічэння аб`ёмаў інвестыцыйнага супрацоўніцтва, стварэння на тэрыторыі Беларусі не толькі сумесных, але і ўласных італьянскіх прадпрыемстваў. «Мы гатовы стварыць для гэтага ўсе неабходныя ўмовы», — сказаў кіраўнік беларускай дзяржавы. У свой час абмяркоўвалася магчымасць стварэння ў Брэсце італьянскага прамысловага парку. Бакі пагадзіліся з неабходнасцю вярнуцца да прапрацоўкі гэтага праекта, для рэалізацыі якога Беларусь абяцае стварыць усе ўмовы.
Кіраўнікі дзяржаў таксама абмеркавалі актуальныя пытанні міжнароднага парадку дня, у тым ліку сітуацыю ва Украіне. «Мінск — гэта зямля, якая абяцае надзею на вырашэнне гэтага канфлікту», — сказаў прэзідэнт Італіі.
Лукашэнка падзякаваў Матарэлу за дапамогу італьянскага боку ў аздараўленні беларускіх дзяцей. Італія ў сваю чаргу ўдзячная Беларусі за канструктыўнае ўзаемадзеянне ў сферы ўсынаўлення дзяцей.
У цэлым Аляксандр Лукашэнка падзякаваў італьянскаму боку за тое, што Італія заўсёды прытрымлівалася прыстойнай і стрыманай пазіцыі ў дачыненні да Беларусі. Кіраўнік беларускай дзяржавы запрасіў Серджыа Матарэлу наведаць Беларусь у любы зручны час. У сваю чаргу прэзідэнт Італіі падзякаваў за запрашэнне і выказаў задавальненне тым, што Беларусі і Італіі ўдалося захаваць канструктыўныя адносіны супрацоўніцтва.
Візіт Лукашэнкі ў Італію і Ватыкан праходзіць 20—21 мая. Гэта яго першы візіт у ЕС пасля адмены Еўрасаюзам санкцыяў у дачыненні да Беларусі 15 лютага.
21 мая ў Ватыкане адбудзецца сустрэча Лукашэнкі з Папам Францішкам. На ёй будзе абмяркоўвацца далейшае развіццё супрацоўніцтва Беларусі з Рымска-каталіцкай царквой.
Аляксандр Лукашэнка наведваў Італію і Ватыкан у 2009 годзе. Тады ён сустракаўся з прэм`ер-міністрам Італіі Сільвіа Берлусконі і Папам Бенедыктам XVI.
