Напад на настаўніцу рускай мовы ў мінскай гімназіі №74 стаўся нечаканасцю для многіх вучняў. Рэч у тым, што аднакласнікі і іншыя знаёмыя і блізка не чакалі ад 16-гадовага Д. такога ўчынку.
«Добра яго ведаю і вельмі даўно. Спакойны хлопец. Ніколі не было такога, каб ён выяўляў агрэсію. І ён заўжды быў ураўнаважаным. Добры вучань, амаль што выдатнік. Ворагаў у яго не было, нармальна меў зносіны з усімі, але асабліва ні з кім не збліжаўся», — расказвае пра падазраванага яго аднакласніца.
Вучань гімназіі, які папрасіў прадставіць яго пад псеўданімам К.M., сцвярджае, што Д. вучыўся на дзявяткі і дзясяткі. Праблемы ў яго былі толькі па рускай мове.
«Здаецца, у чвэрці яму паставілі сем балаў. З-за гэтага і мог здарыцца канфлікт», — паведамляе К.M.
Апроч вучобы Д. займаўся рукапашным боем. Ёсць дакладная інфармацыя, што два гады таму ён займаў першае месца на першынстве Беларусі ў вагавай катэгорыі 55 кг.
«Трэніраваўся ён даўно і заняткі гэтыя не спыняў. Але гэта рукапашны бой, яго трэніроўкі з гэтым выпадкам ніяк не звязаныя», — лічыць аднакласніца Д.
«Ён быў даволі замкнутым чалавекам, нідзе не свяціўся, амаль ніколі пра яго не размаўлялі. А з аднакласнікамі былі добрыя адносіны», — кажа пра падазраванага яшчэ адна крыніца з гімназіі №74.
Д. разам з сябрамі па трэніроўцы. Фота было зроблена ў 2014 годзе.
Настаўніца рускай мовы Валянціна Уладзіміраўна атрымала некалькі ўдараў вострым прадметам. У тым ліку па шыі. Яе прааперыравалі. У аўторак, 24 траўня, дактары вызначылі яе стан як стабільна цяжкі. І дзякуй Богу, што настаўніца выжыла.
Псіхолагі не могуць даць адназначны адказ, што магло падштурхнуць падлетка да жахлівага ўчынку: «Выпадак падлягае комплекснай судовай псіхолага-псіхіятрычнай экспертызе, што дапаможа разабрацца ў гэтай канкрэтнай сітуацыі, а таксама ў псіхапатычных і, магчыма, псіхапаталагічных радыкалах», — апелюе да навуковых тэрмінаў вядомы беларускі псіхолаг, доктар медыцынскіх навук Сяргей Ігумнаў.
