tass.ru
12:46
Лётчыца і народны дэпутат Украіны Надзея Саўчанка ўжо вылецела ва Украіну. Пра гэта УНН стала вядома з уласных крыніц у дыпламатычных колах.
Н.Саўчанка некалькі хвілін таму (па стане на 12:15) вылецела прэзідэнцкім самалётам з аэрапорта горада Растоў-на-доне.
Сустрэлі Надзею Саўчанка прэс-сакратар прэзідэнта Украіны Уладзіслаў Цэголка і намеснік спікера Вярхоўнай Рады Ірына Герашчанка.
Чакаецца, што Пятро Парашэнка сустрэне Надзею Саўчанка ўжо па прыбыцці ва Украіну, імаверна, у аэрапорце.
12:26
Коммерсант са спасылкай на сваю крыніцу перадае, што абмен можа адбыцца ў найбліжэйшыя дзве гадзіны.
12:18
Надзея Саўчанка ўжо дастаўлена ў аэрапорт Растова-на-Доне, паведамляе Інтэрфакс.
Адвакат Ілля Новікаў паведаміў Дождю, што не можа ні пацвердзіць, ні абвергнуць гэтую інфармацыю, але дадаў, што на дадзены момант знаходзіцца ў аэрапорце Растова-на-Доне.
11:45
Як паведамляе УНІАН, у Растоў-на-Доне прыбыў самалёт прэзідэнта Украіны Пятра Парашэнкі, каб забраць на радзіму асуджаную ў Расіі на 22 гады зняволення ўкраінскую лётчыцу Надзею Саўчанка. Пра гэта УНІАН паведаміла інфармаваная крыніца.
«Самалёт прыляцеў у Растоў сёння ноччу. Перадача Саўчанка павінна адбыцца сёння», — сказала крыніца.
Паводле іншых крыніцаў, самалёт яшчэ не прызямліўся ў Растове.
Разам з тым tsn.ua са спасылкай на крыніцу ў АП Украіны паведамляе, што Парашэнка не вылятаў у Растоў-на-Доне.
Па словах крыніцы, кіраўнік дзяржавы цяпер у Кіеве і нікуды ляцець не збіраецца, бо на сёння запланавана пасяджэнне Рады рэформаў.
Тэлефоны ў Адміністрацыі прэзідэнта Парашэнкі не адказваюць, піша «Украінская праўда», але са спасылкай на свае крыніцы перадае, што Саўчанка вернецца ва Украіну «ў другой палове дня».
***
Суразмоўца «Інтэрфакса» ўдакладніў, што Саўчанка перададуць украінскаму боку на падставе дамовы паміж дзвюма дзяржавамі аб выдачы асоб для далейшага адбыцця пакарання. Паводле яго слоў, у Растове-на-Доне ўжо знаходзяцца прадстаўнікі расійскіх праваахоўных органаў, якія суправаджаюць украінку.
«Паводле двухбаковай дамоўленасці, украінскія ўлады там жа перададуць двух расіянаў, затрыманых ва Украіне», — паведаміла крыніца расійскага агенцтва.
Прэс-сакратар прэзідэнта Дзмітрый Пяскоў сказаў РБК, што не валодае такой інфармацыяй.
Адвакат Саўчанка Марк Фейгін на пытанне РБК, ці дастаўлена Саўчанка ў аэрапорт горада Растоў-на-Доне, заявіў, што не каментуе сітуацыю, але і не стаў абвяргаць звесткі.
Адвакат Аляксандрава Валянцін Рыбін у размове з РБК выказаў здагадку, што «абмен блізкі», бо, наколькі яму вядома, Саўчанка не перасячэ мяжу Украіны, калі расіяне не апынуцца ў Расіі. Ён дадаў, што хадайніцтва аб памілаванні расіян ужо было пададзена.
***
22 сакавіка Надзея Саўчанка была асуджаная да 22 гадоў зняволення. Следства абвінаваціла яе да гібелі двух расійскіх журналістаў у Луганскай вобласці Украіны ў 2014-м годзе. Следчыя сцвярджаюць, што яна карэктавала кірунак артабстрэлу, ахвярамі якога сталі расіяне. Акрамя таго, яе абвінавачвалі ў незаконным перасячэнні расійскай мяжы.
***
Украіна памілавала байцоў ГРУ
Украіна памілавала расіянаў Яўгена Ерафеева і Аляксандра Аляксандрава. Пра гэта паведамляе Reuters са спасылкай на крыніцу, знаёмую з сітуацыяй.
Раней адвакат Аляксандрава паведаміў, што кіраўніку ўкраінскай дзяржавы пададзена прашэнне аб памілаванні расіянаў.
