Адноўленае папярэдняе следства па крымінальнай справе, заведзенай па факце збіцця фігуранта «справы графіцістаў» Вячаслава Касінерава. Гэта стала вядома з адказу Маскоўскага раённага аддзела Следчага камітэту па горадзе Мінску на зварот актывіста, які ён атрымаў тыдзень назад.
«Інфармуем, што папярэдняе следства па крымінальнай справе №… прыпыненае 14 сакавіка, на падставе п1.ч1 арт 246 Крымінальна-працэсуальнага кодэксу пастановай ад 16 траўня адноўленае. У цяперашні час праводзяцца следчыя і іншыя працэсуальныя дзеянні, канчатковае рашэнне па крымінальнай справе не прынята».
Вячаслаў Касінераў, якому падчас затрымання супрацоўнікі САХР (спецыяльны атрад хуткага рэагавання ўнутранных войскаў МУС Беларусі)11 жніўня 2015 года зламалі сківіцу, працягвае дамагацца прыцягнення да адказнасці асоб, датычных гэтай справы.
14 сакавіка следства па гэтай справа было прыпыненае, паколькі следчыя Маскоўскага раённага аддзела СК па горадзе Мінску «не змаглі ўстанавіць асобу, якая падлягае прыцягненню ў якасці абвінавачанага».
Зацягнутыя тэрміны следства і прыпыненне папярэдняга расследавання, на думку праваабаронцаў, могуць сведчыць альбо аб прафесійнай непрыдатнасці следчых, альбо аб нежаданні дакапацца да ісціны ў гэтай справе.
