Фота Сяргея Гудзіліна
Настаўніца 74-й мінскай гімназіі, пацярпелая ад нападу вучня, атрымае кампенсацыю, паведаміла 26 мая на прэс-канферэнцыі ў Мінску прэс-сакратар Міністэрства адукацыі Юлія Барадун.
Памер кампенсацыі, паводле яе слоў, будзе вызначаны асобна. «Дэпартамент па працы вынесе пастанову па гэтым выпадку, паколькі гэта беспрэцэдэнтны выпадак, і будзем спадзявацца, што ён першы і апошні», — сказала прэс-сакратар.
«Вядома, гэта страшная сітуацыя, — дадала Барадун. — Зараз над ёй працуе Следчы камітэт, і каментароў па самой сітуацыі я даць не магу. Што тычыцца нашага міністэрства, то мы плануем ва ўзаемадзеянні з іншымі ведамствамі, у тым ліку Міністэрствам унутраных спраў, дадаткова прапрацаваць меры бяспекі. Як толькі план будзе распрацаваны, мы абавязкова прадставім яго грамадскасці».
***
Нагадаем, раніцай 23 мая вучань 9-га класа 74-й гімназіі Мінска напаў на 57-гадовую настаўніцу з нажом, нанёсшы ёй некалькі ўдараў у вобласць шыі. Педагог у цяжкім стане была дастаўленая ў бальніцу. У дачыненні да падлетка прызначаная комплексная псіхолага-псіхіятрычная экспертыза. Па стане на 25 мая ён не даваў паказанняў.
