Віцэ-прэзідэнт Сусветнага банка Сірыл Мюлер наведае Беларусь 1—2 чэрвеня, паведаміла спецыяліст па сувязях з грамадскасцю прадстаўніцтва Сусветнага банка ў Беларусі Ірына Алейнік.
Чакаецца шэраг сустрэч віцэ-прэзідэнта банка з кіраўніцтвам краіны, у тым ліку з Аляксандрам Лукашэнкам, прэм'ер-міністрам Андрэем Кабяковым і старшынёй Савета Рэспублікі Міхаілам Мясніковічам.
Падрыхтоўка візіту абмяркоўвалася на сустрэчы намесніка прэм'ер-міністра Анатоля Калініна з кіраўніком прадстаўніцтва Сусветнага банка ў Беларусі Ян Чул Кімам ў красавіку. Як паведамляла прэс-служба беларускага ўрада, візіт рыхтаваўся «ў мэтах прыняцця кіраўніцтвам банка станоўчага рашэння аб фінансаванні перспектыўных праектаў». Паведамлялася, што банкам ўхваленыя прапанаваныя беларускім бокам канцэпцыі праектаў у сферах аховы здароўя і гандлю і распачатая «тэхнічная праца па падрыхтоўцы адпаведных пагадненняў».
Ян Чул Кім раней заяўляў, што інвестыцыйны партфель дзейных праектаў Сусветнага банка для Беларусі ў 2017 годзе можа вырасці да 1,2 млрд даляраў.
