Мерапрыемствы, што праводзяцца НАТА блізу межаў Беларусі, з`яўляюцца патэнцыйным выклікам, які патрабуе адэкватных мер рэагавання, заявіў намеснік міністра замежных спраў Беларусі Яўген Шастакоў.
«Мерапрыемствы, якія праводзяцца НАТА або пад эгідай НАТА блізу нашых межаў — а з дзяржавамі Паўночнаатлантычнага альянсу у нас больш за 1.200 км агульнай мяжы, — а таксама нарошчванне адпаведнай інфраструктуры хоць на гэты момант і не расцэньваюцца як прамая ваенная пагроза, не ўспрымаюцца намі пазітыўна.
Гэта патэнцыйны выклік у рамках Саюзнай дзяржавы Беларусі і Расіі, які патрабуе адэкватных мер рэагавання», — заявіў Шастакоў у інтэрв`ю кубінскаму інфармацыйнаму агенцтву Прэнса Лаціна. Яўген Шастакоў 2—5 чэрвеня знаходзіцца на Кубе з рабочым візітам, стэнаграма яго інтэрв`ю размешчаная на сайце МЗС.
Як адзначыў намеснік кіраўніка МЗС, сёння ўзрастае «пагроза дэстабілізацыі і без таго хісткай архітэктуры бяспекі ва ўсім Еўрапейскім рэгіёне».
Беларусь, паводле слоў Шастакова, традыцыйна прыкладнае ўсе магчымыя намаганні для забеспячэння ваенна-палітычнай стабільнасці на сваіх межах і ў свеце ў цэлым. «Як дзяржава, якая мае свае інтарэсы і на Усходзе, і на Захадзе, мы не зацікаўленыя ў абвастрэнні сітуацыі», — падкрэсліў ён.
«Тое, што адрозненні ў падыходах па арганізацыі рэгіянальнай бяспекі паміж ключавымі гульцамі Еўрапейскага кантынента ўсё больш трансфармуюцца ў рэальнае нарошчванне ваенных патэнцыялаў, аб`ектыўна не адпавядае нічыім інтарэсам. Мы не падзяляем падыходаў па «прыцягванні» на сваю тэрыторыю дадатковых замежных ваенных аб`ектаў і сіл. Зыходзім з таго, што такія дзеянні аслабляюць бяспеку канкрэтнай дзяржавы», — адзначыў намеснік кіраўніка беларускага знешнепалітычнага ведамства.
На яго думку, у сучасных умовах роўная бяспека не можа быць дасягнутая «напампоўваннем ваенных мускулаў» якіх-небудзь ваенных блокаў або альянсаў дзяржаў. «Беларусь цвёрда прытрымліваецца прынцыпу вырашэння ўсіх канфліктных сітуацый і ўсіх праблемных пытанняў выключна дыпламатычным шляхам, за сталом перамоў», — сказаў на заканчэнне Шастакоў.
Як паведамлялася, цяпер Расія праводзіць перадыслакацыю сваіх некалькіх ваенных злучэнняў у заходнія акругі блізу расійска-беларускай мяжы.
Пра запланаваныя перасоўванні расійскіх войскаў з цэнтральнай частцы краіны ў заходнюю і фарміраванне трох новых дывізій на заходнім напрамку ў адказ на ўзмацненне ваеннага патэнцыялу НАТА ва Усходняй Еўропе кіраўніцтва Расіі абвясціла яшчэ ў 2015 годзе. Зараз у Бранскую вобласць перадыслакуецца 28-я асобная мотастралковая брыгада, якая раней размяшчалася пад Екацярынбургам.
Міністр абароны Расіі Сяргей Шайгу назваў фарміраванне на заходнім напрамку ў 2016 годзе трох дывізій «задачай найважнейшай». Разгортванне злучэнняў каля межаў, паводле яго слоў, з`яўляецца «адэкватнымі ваенна-тэхнічнымі мерамі ў адказ» на разгортванне ваеннай інфраструктуры ЗША і НАТА блізу расійскіх межаў, а таксама «рэалізацыю імі небяспечных супрацьракетных планаў і нарошчванне ваенных расходаў».
