Для еўрапейцаў па-ранейшаму адной з галоўных праблем з'яўляецца міграцыйны крызіс. Адным з варыянтаў вырашэння сітуацыі з бежанцамі можа стаць план Еўракамісіі (ЕК) заключыць партнёрскія пагадненні з дзевяццю краінамі Афрыкі і Блізкага Усходу, каб процістаяць нелегальнай міграцыі, перадае ТАСС.
Паводле слоў еўракамісара па пытаннях міграцыі, унутраных спраў і грамадзянства Дзімітрыса Аўрамопуласа, такія пагадненні плануецца заключыць з Іарданіяй, Ліванам, Тунісам, Нігерам, Малі, Эфіопіяй, Сенегалам, Нігерыяй і Лівіяй. Чыноўнік растлумачыў, што з кожнай з гэтых краін ЕК хацела б заключыць розныя дамоўленасці аб тым, каб названыя дзяржавы прымалі назад нелегальных мігрантаў.
Еўракамісары падлічылі, што на фінансаванне такой ініцыятывы могуць быць выдзелены дзясяткі мільярдаў еўра. Так, у перыяд з 2016 па 2020 год такія партнёрскія пагадненні абыдуцца ЕК прыкладна 8 млрд еўра. Плюс да гэтага восенню ЕК прадставіць план па барацьбе з прычынамі міграцыі аб'ёмам 31 млрд еўра з улікам прыватных інвестыцый.
Краіны, якія будуць згодны на супрацоўніцтва з Еўрасаюзам, атрымаюць фінансавую дапамогу і развіццё гандлёвых адносін.
