Сёння на вуліцы Магілёўскай прайшло афіцыйнае адкрыццё скандальнага графіці з беларускім хлопчыкам і расійскай дзяўчынкай. «Малады фронт» заклікаў мінчукоў далучыцца да мерапрыемства асобным пікетам.
Самыя яркія моманты з пікета:
Людзі ў цывільным перашкаджалі пратэстоўцам і не давалі прайсці да месца ўрачыстага адкрыцця.
Пад бадзёрыя песні з дынамікаў пра любоў да Расіі лідар «Маладога фронта» Зміцер Дашкевіч і іншыя актывісты разгарнулі бел-чырвона-белыя сцягі і плакаты з надпісамі «Саюз з агрэсарам = вайна», «Не саюзу з бандай» і іншыя.
Да месца афіцыйнага мерапрыемства пікетоўцаў не пусціў шчыльны шэраг міліцыянтаў у цывільным. На актывістаў масава складалі пратаколы.
Меркавалася, што на адкрыцці выступяць прадстаўнікі ўладаў Мінска і Масквы, для іх нават усталявалі невялікую сцэну з двума мікрафонамі. Аднак ніякіх прамоваў не было: афіцыйныя асобы толькі разбілі аб сцяну бутэльку (мабыць, з шампанскім) і ўручылі сертыфікат аб падарунку графіці Мінску ад урада Масквы.
Акрамя дзяцей і афіцыйных асоб, на адкрыцці прысутнічала Камуністычная партыя Беларусі. Удзельнікі рабілі выгляд, як быццам нічога не адбывалася.
Урачыстае адкрыццё прайшло не на падрыхтаванай сцэне з мікрафонамі, а ў куце дома толькі для журналістаў.
