Асацыяцыя па абароне інтэлектуальнай уласнасці Японіі (IPPA) выбачылася і паабяцала правесці рэфармаванне порнаіндустрыі пасля абвінавачванняў з боку актывістаў у тым, што жанчын прымушалі да палавых актаў для здымак порнафільмаў.
Па выніках нарады з юрыстамі і праваабаронцамі прадстаўнікі IPPA заявілі, што прадставяць новыя прапановы для рэгулявання дзейнасці кампаній, якія выпускаюць відэа парнаграфічнага характару.
У прыватнасці, такія кампаніі будуць абавязаны атрымліваць згоду акторак на здымку ў порнароліках і не будуць мець права штрафаваць іх, калі яны адмовяцца ад здымак.
Раней у чэрвені паліцыя Японіі арыштавала былога кіраўніка акцёрскага агенцтва Marks Japan і яшчэ двух мужчын па справе жанчыны, якая паведаміла, што яе некалькі разоў гвалтавалі перад камерай. Пры гэтым ёй пагражалі буйнымі штрафамі і заяўлялі, што адмова ад сэксу будзе парушэннем кантракту.
Як адзначыла ў інтэрв'ю Франс-прэс актывістка Сіхока Фудзівара, каля 20% японскіх кампаній-вытворцаў порнаролікаў не з'яўляюцца чальцамі IPPA і выпускаюць відэа нелегальна, таму неабходныя дзеянні з боку ўрада.
У сакавіку праваабарончая група Human Rights Now заяўляла пра рост колькасці выпадкаў, калі маладыя жанчыны, якія жадаюць стаць мадэлямі, прымушаліся да здымак у парнаграфічных відэароліках.