Інфармацыя пра звальненне актора і барда з’явілася сёння на старонцы Гарадзенскай бібліятэкі ў Фэйсбуку.
«Даведаліся мы, што наш славуты актор і бард Віктар Шалкевіч звольнены з Гарадзенскага абласнога тэатра лялек.
Кажуць, бард Шалкевіч дазволіў сабе вольнадумнічаць са сцэны на канцэрце, які адбыўся ў Гродне 10 чэрвеня. Пільным гарадзенскім ідэолагам і кіраўніцтву не спадабалася і ўсё - пішы заяву, бывай «Тутэйшыя», — заяўлялася ў допісе.
У Гродзенскім абласным тэатры лялек, дзе Шалкевіч працуе з 1990 года, інфармацыю пра звальненне абверглі.
«Віктар неўзабаве ідзе ў адпачынак, бо ў яго запланаваныя свае выступы, але з верасня працягне працу ў тэатры», — запэўніла Марыя Шабашова, дырэктарка тэатра.
Яна падкрэсліла, што чуткі пра звальненне — гэта толькі чуткі.
Сам Віктар Шалкеівч пракаментаваў сітуацыю так: «Я пакуль у адпачынку, а далей будзе бачна. Ва ўсякім выпадку, кантракт у мяне да наступнага года».
