Хлеба менш, каўбасы больш: пасля дэнамінацыі цэны вернуцца да «савецкіх». Цікава параўнаць
У ноч на 1 ліпеня ў Беларусі мае адбыцца галоўная эканамічная падзея года — дэнамінацыя. Мільёны і тысячы адыходзяць у нябыт, затое вяртаюцца капейкі. Апошні раз беларусы карысталіся манетамі ў савецкі час. Адкіданне нулёў верне многіх у той час, калі каўбаса каштавала 2 рублі 20 капеек.
Давайце для параўнання перанясёмся ў 1986 год — тады яшчэ савецкая эканоміка дзейнічала ў сваім стабільным рэжыме.
У 1986 годзе сярэдні заробак у БССР складаў 180 рублёў. Цяпер сярэдні заробак складае 718 новых рублёў. «Розніца» — 4 разы.
Узгадаем, якія цэны былі тады і якія цяпер.
Зразумела, параўноваць спажывецкі кошык тых і цяперашніх часоў не заўсёды карэктна. У крамах сотні тавараў, якіх савецкія грамадзяне не бачылі ў вочы. Глабальная эканоміка і канкурэнцыя вытворцаў дазволілі пакаштаваць стравы іншых кухняў ды паласавацца экзатычнымі фруктамі.
З іншага боку, каб знайсці такую ялавічыну ці курыцу, якія былі ў СССР, трэба пастарацца. Мяса тады было нібыта таннейшае, чым цяпер, але значна горшай якасці — з косткамі, перамарожанае.
Яшчэ адна асаблівасць — аб’ём тавараў. Літровае малако ці кілаграмовы пакет рысу ў крамах рэдка калі ўбачыш. Таму цяперашнія цэны мы пералічылі ў разліку на савецкія нарматывы.
Сярод базавых прадуктаў для беларусаў даражэйшымі сталі хлеб і грэчка.
Асабліва відавочная розніца з цэнамі на хлеб. У савецкі час ён быў, лічы, дармавым. Цяпер жа даводзіцца плаціць рэальны кошт.
А вось што стала ўдвая больш даступным, дык гэта гарэлка.
Раней на заробак можна было набыць 18 бутэлек, цяпер жа — ажно 120. Вось такі «клопат» пра здароўе нацыі.
У цэлым жа ў незалежнай Беларусі людзі жывуць нашмат багацей, чым у СССР.
Цяпер чытаюць
У пачатку вайны кавэзэшніцу Марыну Грыцук вывозілі з-пад Кіева на танку. Цяпер яна вядзе мерапрыемствы ў Расіі6
Каментары