«Відэакамерай ЦРУ у кожным доме» назвала «Беларуская ваенная газета» мабільную гульню Pokemon Go, якая хутка заваявала папулярнасць ва ўсім свеце.
Аўтар матэрыялу, на жаль, спасылаецца не на рэкамендацыі беларускіх ваенных спецыялістаў па кібер-бяспецы, але расійскага блогера, які наўпрост звязаў распрацоўшчыкаў гульні з Цэнтральным разведвальным упраўленнем ЗША.
newsru.co.il
Амаль увесь артыкул уяўляе з сябе цытату з паста расійскага блогера — не надта аўтарытэтная крыніца для афіцыйнага ваеннага выдання.
Паводле меркавання блогера, Pokemon Go была створаная па замове ЦРУ з разведвальнымі мэтамі, таму што распрацоўшчык гульні кампанія Niantic Labs была створана Джонам Хэнкам, а Хэнк раней заснаваў кампанію Keyhole, Inc., якая частку фінансавання на праект па картаграфаванні зямлі атрымала ад венчурнага фонда ЦРУ.
«Заставалася адна праблема: як зазірнуць у нашы хаты, скляпенні, цяністыя алеі, казармы, дзяржустановы і гэтак далей па спісе? … Канторка Niantic Labs выпускае геніяльную вірусную гульню з навамоднай тэхналогіяй дапоўненай рэальнасці», - цытуе газета замежнага блогера.
Раней аддзел інфармацыйнай бяспекі ізраільскай арміі паведаміў жаўнерам, што гульня патрабуе інфармацыю пра месцазнаходжанне чалавека і аб'екты, якія знаходзяцца побач з ім. Да таго ж, гэтая інфармацыя можа патрапіць у адкрыты доступ у інтэрнэце. Гэта стварае небяспеку для вайскоўцаў.
Аднак ізраільскія ваенныя камп'ютаршчыкі абышліся без цытат з расійскіх цывільных блогаў.