Улад, беспрацоўны з Бярозаўскага раёна, паказаў, як яго і іншых людзей прымусілі таптаць зямлю. Па словах Улада, у гэтым заключалася адпрацоўка, на якую іх адправілі ў службе занятасці, піша Onliner.by.
Ён растлумачыў, што ўсіх беспрацоўных, якія стаяць на ўліку ў службе занятасці, раз на месяц адпраўляюць працаваць. Каля тыдня таму Улада запрасілі на адпрацоўку, прыстрашыўшы ў выпадку няяўкі зняць яго з уліку. Яго папярэдзілі, што з сабой трэба ўзяць гумовыя боты.
На наступны дзень Улад і яшчэ некалькі беспрацоўных адправіліся ў калгас на пасадку буякоў. На месцы ж ім прапанавалі ўтрамбаваць грунт — але не інструментамі, а нагамі.
Беспрацоўным прыйшлося таптаць зямлю пяць гадзiн, з дзявятай раніцы да другой дня. Уладу такая праца не спадабалася: «На дварэ 21-е стагоддзе, а мы нагамі топчам зямлю». Але прадстаўнік сельскагаспадарчага прадпрыемства заявіў, што ўсё так і павінна быць, таму што ў цяпліцу не праязджае спецыяльная машына для ўтрамбоўкі грунту.
Супрацоўніца ўпраўлення па працы, занятасцi i сацыяльнай абароне, якое накіравала групу людзей на такую адпрацоўку, заявіла, што да яе скаргаў не паступала і калі кагосьці штосьці не задавальняе, яна разбярэцца.
