У Беларусі сфарміравана амаль 6000 участковых выбаркамаў для правядзення парламенцкіх выбараў. Малая доля апазіцыянераў у іх тлумачыцца тым, што ў гэтых людзей няма аўтарытэту на месцах, заявіла кіраўнік ЦВК Лідзія Ярмошына на прэс-канферэнцыі ў Мінску.
Лідзія Ярмошына. Фота Сяргея Гудзіліна.
Усяго ва УВК вылучалася 73 278 чалавек, прайшло ў іх склад 65 857 (90%). Пры гэтым «праходнасць» у склад выбаркамаў апазіцыі аказалася ў пяць разоў ніжэй — 17%.
Усяго 53 з вылучаных 303 прадстаўнікоў апазіцыйных партый патрапілі ў склад УВК. Атрымліваецца, што апазіцыянераў у гэтых камісіях, якія і адказваюць за падлік галасоў, будзе па ўсёй краіне менш за 0,1%.
Чаму так зноў атрымалася?
«Мы рэкамендавалі ацэньваць усю характарыстыку асобы, яе месца ў грамадстве, яе сацыяльны аўтарытэт. З гэтага робіцца выснова пра ўключэнне таго ці іншага чалавека ў склад участковых выбарчых камісій», — заявіла Ярмошына.
Яна патлумачыла, што ўключэнне апазіцыянераў у выбаркамы часта залежыць ад таго, якую партыю яны прадстаўляюць: «Часцей за ўсё задавальняюцца заяўкі партыі левых «Справядлівы свет», таму што гэта людзі, якія, як правіла, даўно і добра умантаваныя ў грамадства і карыстаюцца аўтарытэтам».
«Часцяком у апазіцыйныя партыі ідуць людзі, у якіх жыццё не склалася, якія не задаволеныя ні сваім жыццём, ні уладай. У іх і ў грамадстве часцяком існуе канфрантацыя з тымі, хто іх акружае», — мяркуе Ярмошына.
Каментуючы нетраплянне ў склады выбаркамаў нават такіх вядомых людзей, як былыя дэпутаты Вярхоўнага Савета, напрыклад, Аляксандра Дабравольскага з АГП, Лідзія Ярмошына падкрэсліла: «Вядомасць і аўтарытэт — дзве розныя рэчы. Можна быць шырока вядомым чалавекам, але з адмоўным абаяннем».
* * *
Чытайце таксама:
Гісторыя ўзлёту бабруйскай юрысткі Лідзіі Ярмошынай. Падрабязнасці жыцця старшыні ЦВК
