Турысты ў захапленні: такая Беларусь ім падабаецца.
У суботы каля Ратушы даюць канцэрты класічнай музыкі. У мінулым месяцы ігралі джаз. У гэтую ж суботу там іграў Дзяржаўны камерны аркестр з маладымі салістамі Кансерваторыі.
Аднак класікай не абмяжоўвалася. За царквой Святога Духа, на рагу за кляштарам базыльянак, танцавалі зумбу.
Удзельнічаць мог кожны:
Асабліва самааддана танцавала пара расійскіх турыстаў:
Усё гэта дзеля збору грошай сям'і інваліда, каб збылася яго мара — паездка на мора. Бачыце, скрынка стаіць на зямлі.
Ініцыятыва называецца «Пешаходка» ў межах кампаніі MaeSens.
Тым часам у суседнім дворыку між царквой Святога Духа і кляштарам базыльянцаў — моладзь танцавала хіп-хоп.
А ў дворыку на Зыбіцкай ігралі мінскія студэнцкія рок-гурты.
На Герцэна (былым Мала-Манастырскім завулку) ігралі скрыпачы. Вакол кожнага з артыстаў стаялі гуртам турысты.
Нарэшце, на самой плошчы Свабоды ішоў кірмаш рамеснікаў. У гэты вечар сюды, акрамя мінчукоў, прыехалі саматужнікі са Старых Дарог з ручнікамі, кошыкамі і іншай карыснай драбязой.
А на месцы колішняга Малога гасцінага двара — дай бог яму адбудавацца — ідзе мілая выстава партрэтаў з калекцыі Мастацкага музея. Вельмі цікавыя подпісы — праўда, без беларускамоўнага варыянта іх.
На выставе — партрэты «легендарных мінчукоў», навукоўцаў, дзеячоў культуры і нават спартоўцаў.
Партрэт Стэфаніі Станюты пэндзля яе бацькі, беларускага імпрэсіяніста Міхася Станюты. Праўнучка Стэфаніі, Меліціна, гэтымі днямі выступае на Алімпіядзе ў Рыа ў мастацкай гімнастыцы.
Подпісы да карцін Мастацкі музей дае толькі на адной мове.
Вось такая атмасфера вясёлага майдану пануе ў беларускай сталіцы летнімі вечарамі. Рэкамендуем яе гасцям сталіцы: бяспека там абсалютная, спецназ дзяжурыць пад кожнай ліхтарняй.
Прысутнічаюць яны і на Зыбіцкай каля новай скульптуры: падарунку Саюзу архітэктараў ад Саюза дызайнераў, чыгунная баба.
