Правакатары закідалі ўдзельнікаў шэсця на Дзень Незалежнасці яйкамі ВІДЭА
Пад самы канец акцыі, калі ўдзельнікі яшчэ не разышліся, пяцёра правакатараў пачалі шпурляць яйкамі ў натоўп. Праз пару секунд яны кінуліся наўцёкі. Даганяць іх пабеглі некалькі ўдзельнікаў акцыі, адзін з журналістаў «НН», а таксама двое міліцыянтаў, вельмі незадаволеных такім паваротам справы.
Правакатары, меркавана, прыстроіліся да калоны каля Палаца Прафсаюзаў. Ужо тады яны падаліся некаторым падазронымі, бо ў цёплы жнівеньскі вечар усе былі апранутыя ў курткі з каптурамі.
19:35
Як перадае журналіст «НН», пагоня працягваецца, дабеглі ўжо да праспекта Дзяржынскага. Адзін з міліцыянтаў пазычыў у нейкага мінака ровар і паехаў у паказаным кірунку, куды меркавана звярнулі двое правакатараў.
Паводле звестак другога рэпарцёра «НН», адзін з назіральнікаў праваабарончага цэнтра «Вясна» меў з сабой ровар і таксама паехаў даганяць правакатараў. З яго слоў, усе яны ўскочылі ў нейкі сіні бус, які стаяў побач з будынкам універсітэта. Такім чынам, паказанні разыходзяцца.
19:45
На пытанне карэспандэнта, чаму не спрацавала ачапленне, міліцыянты сказалі, што «расслабіліся», бо акцыя ўжо скончылася, а асноўная ўвага да таго, што адбываецца, была падчас шэсця. На пытанне, ці была перад акцыяй у міліцыі інфармацыя пра магчымыя правакацыі, яны адказалі, што не было, і калі б яны нешта ведалі, то не дапусцілі б такога.
19:50
Паводле звестак сведкаў, калі адзін з удзельнікаў акцыі спытаў камандзіра мінскага АМАПу Балабу, ці будуць лавіць правакатараў, той па-беларуску адказаў: «Ты што, не бачыш?» Тым часам большасць супрацоўнікаў сілавых структур проста стаялі і ўсміхаліся.
20:00
Карэспандэнт «НН» папрасіўся ў машыну да міліцыянтаў, каб працягнуць удзел у пагоні. Тыя з усмешкай адмовілі, кажучы, што, маўляў, транспарт у іх для супрацоўнікаў альбо для затрыманых, а затрымліваць рэпарцёра ім нешта не хочацца…
Упершыню за чатыры гады Белстат апублікаваў звесткі аб нараджальнасці і смяротнасці. Даныя жахаюць39
Упершыню за чатыры гады Белстат апублікаваў звесткі аб нараджальнасці і смяротнасці. Даныя жахаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў99
Каментары