Працягваюць паступаць звесткі аб загінулых у выніку магутнага землятрусу 24 жніўня і наступных падземных штуршкоў у Італіі. Як паведамляюць інфармагенцтвы, колькасць загінулых узрасла да 281 чалавека, у медыцынскіх установах застаюцца каля 400 пацярпелых, прычым 40 з іх знаходзяцца ў вельмі цяжкім стане. Каля 2,5 тысяч чалавек засталіся без прытулку.
Адзначаецца, што ў найбольш пацярпелым ад прыроднай катастрофы горадзе Аматрычэ ратавальнікі ўсё яшчэ вядуць пошукі 15 зніклых без вестак чалавек.
Землятрус пачаўся ўначы з 24 на 25 жніўня, затым было яшчэ некалькі падземных штуршкоў рознай магнітуды.
Грамадзяне Беларусі, якія хочуць выказаць сваю салідарнасць з італьянскім народам, могуць пакінуць запіс у кнізе спачуванняў, адкрытай у пасольстве Італіі ў Мінску, а таксама напісаць на адрас [email protected].