Міністр замежных спраў Германіі Франк-Вальтэр Штайнмаер Фота: BRITTA PEDERSEN / POOL / AFP
Міністр замежных спраў Германіі Франк-Вальтэр Штайнмаер выступае за вяртанне Расіі ў G8, але лічыць, што гэта магчыма толькі пасля істотнага прагрэсу ў сітуацыі па Данбасе і Сірыі. Аб гэтым кіраўнік МЗС заявіў у інтэрв'ю RedaktionsNetzwerk Deutschland.
«Ключ да вяртання фармату G8 знаходзіцца ў Маскве», — сказаў міністр. Паводле яго слоў, канфлікты ў Сірыі і ва Украіне дэманструюць, што Расея не можа быць выключаная «з цеснага супрацоўніцтва найбуйнейшых эканомік свету».
«Калі нарэшце будзе істотны прагрэс па сітуацыі ва ўсходняй частцы Украіны і ў перамовах аб спыненні агню ў Сірыі, партнёры па G7, вядома, гатовыя размаўляць з Масквой», — падкрэсліў Штайнмаер.
Ён адзначыў, што перамовы з Расіяй ідуць цяжка і той факт, што ў Крыме і ва Украіне Расея парушыла асноўныя еўрапейскія прынцыпы, ніхто не адмаўляе.
«Але менавіта ў такой сітуацыі павінна быць у нашых інтарэсах — пазбегнуць далейшай эскалацыі і стварыць празрыстасць там, дзе парушаны давер. Перазапуск у галіне кантролю над узбраеннямі не з'яўляецца саступкай Расіі, але ў інтарэсах усёй Еўропы»,
— сказаў на заканчэнне міністр.
Выданне адзначае, што заявы кіраўніка МЗС прагучалі напярэдадні канферэнцыі Арганізацыі па бяспецы і супрацоўніцтве ў Еўропе (АБСЕ), у якой возьмуць удзел прадстаўнікі 57 краін, у тым ліку Расіі.
Пасля далучэння Крыма ў 2014 годзе Расея перастала ўдзельнічаць у сустрэчах «вялікай васьмёркі». Тады саміт павінен быў адбыцца ў Сочы, аднак у выніку прадстаўнікі сямёркі правялі сустрэчу ў Брусэлі. У 2015 годзе лідары Германіі, Францыі, Вялікабрытаніі, Італіі, Японіі, Канады і ЗША правялі саміт у Баварыі, у 2016-м — у японскай Хірасіме.
Штайнмаер неаднаразова заяўляў пра тое, што Расея павінна вярнуцца ў G8. Тым не менш у красавіку 2016 года намеснік кіраўніка расійскага МЗС Сяргей Рабкоў заявіў, што для Масквы фармат G8 застаўся ў мінулым. У Крамлі таксама прызналі, што гэтае пытанне не стаіць на парадку дня.
