Расійскі шавіністычны сайт «Спутнік і пагром» зноў ударыўся ў звыклыя для сябе фантазіі. На гэты раз рэсурс Ягора Прасвірніна кінуўся падлічваць, колькі ж медалёў у Рыа-дэ-Жанэйра заваявалі «рускія» спартсмены.
Перш-наперш са спісу «рускіх» былі выкінутыя ўсе прадстаўнікі каўказскіх народаў, якія традыцыйна добра выступаюць у адзінаборствах.
«Спутнік і пагром» вырашыў таксама не ўключаць украінскіх медалістаў. Гэта яны патлумачылі жаданнем не падстаўляць «рускіх» спартсменаў Украіны.
А вось беларуская зборная была ўключаная амаль у поўным складзе. Выключэннем сталі барцы Джавід Гамзатаў і Ібрагім Саідаў, а таксама плыўчыха Аляксандра Герасіменя.
Калі з Гамзатавым і Саідавым усё ясна, то Герасіменю не ўключылі з прычыны таго, што яна лічыць сябе «беларускай». Так-так, слова «беларусы» гэты чарнасоценскі сайт бярэ ў двукоссі, падкрэсліваючы, што ніякай Беларусі няма.
Таксама з нейкай прычыны са спісу «рускіх» была выключана вяслярка Марына Літвінчук, хаця тры яе партнёркі па чоўне ўключаныя.
Яшчэ ў «рускія» спартсмены ўключаныя некаторыя казахі, азербайджанцы і немцы.
Вось так некаторыя расійскія сайты спрабуюць прывучыць, што Беларусь — гэта частка Расіі. А тым беларусам, якія з гэтым не згодныя, не месца ў «рускім свеце».
Праўда, такія фантазіі шавіністаў выглядаюць абсалютна абсурднымі і недарэчнымі.