Бургамістр польскага горада Аўгустова Войцех Валюлік прыбыў з афіцыйным візітам у Гродна на незвычайным транспарце — байдарцы.
Кіраўнік горада пераадолеў увесь шлях паміж гарадамі па Аўгустоўскім канале і Нёмане разам з вядомымі польскімі спартоўцамі-веслярамі.
Ён падкрэсліў, што адной з галоўных мэтаў падарожжа лічыць умацаванне супрацоўніцтва паміж Аўгустовам, Гроднам і Друскінінкаем, у які польская дэлегацыя адправіцца пасля наведвання беларускага горада.
«Нас падзяляе невялікая адлегласць, нам ёсць, чым дапоўніць адзін аднаго. Гродна, напрыклад, прыгожы гістарычны горад з багатай гісторыяй і традыцыямі, у нас — цудоўная прырода. Мы, вядома, зацікаўленыя ва ўзаемавыгадным супрацоўніцтве», — падкрэсліў Войцех Валюлік. Ён адзначыў, што магчымасць наведвання замежнікамі беларускай часткі Аўгустоўскага канала без віз адкрывае яшчэ больш шырокія перспектывы для рэалізацыі разнастайных сумесных праектаў у турыстычнай сферы, а цяперашні візіт стане яму выдатнай рэкламай.
У сераду, 7 верасня, паміж Гроднам і Аўгустовам, як плануецца, будзе падпісаная дамова аб супрацоўніцтве. Як адзначалася ў час сустрэчы, гарады ўжо рыхтуюць сумесны праект для праграмы трансгранічнага супрацоўніцтва. Ён прадугледжвае будаўніцтва велапешаходных мастоў праз Нёман у Гродне і раку Нету ў Аўгустове.
