Участковая выбарчая камісія, якую ўзначальвае вядомы бізнесмен Павел Тапузідзіс, прыняла рашэнне выдаліць ўсіх назіральнікаў з участка для галасавання №347 Сухараўскай выбарчай акругі № 101 у Мінску.
Гэтаму рашэнню папярэднічаў інцыдэнт з актывістам руху «За Свабоду» Пятром Маркелавым — адным з назіральнікаў, вылучаных ад выбаршчыкаў. Назіральнік патрабаваў у членаў камісіі прадэманстраваць яму прапіску некаторых выбаршчыкаў, якіх ён падазраваў у гэтак званай каруселі. Пры гэтым Маркелаў здымаў членаў камісіі і міліцыянераў фотаапаратам. У выніку назіральніка павезлі з участка чатыры выкліканых міліцыянера. Члены выбарчай камісіі пазбавілі Маркелава акрэдытацыі.
Пасля гэтага старшыня камісіі Тапузідзіс вынес на галасаванне пытанне аб выдаленні з участка для галасавання ўсіх назіральнікаў — 11 чалавек, сярод якіх прадстаўнікі «Белай Русі», БРСМ, Чырвонага Крыжа, Фонду міру, Беларускага саюза жанчын, Сацыяльна-спартыўнай партыі, Аграрнай партыі, Руху «За свабоду», Аб'яднанай грамадзянскай партыі, а таксама назіральнікі ад выбаршчыкаў.
Камісія аднагалосна падтрымала гэтую прапанову, пасля чаго большая частка назіральнікаў пайшла. Пакінуць участак для галасавання адмовіліся толькі два назіральнікі — актывіст руху «За Свабоду» Алесь Лагвінец і назіральнік ад АГП Багдан Сакалоў. Сваю адмову яны аргументавалі тым, што камісія не азнаёміла іх з пратаколам галасавання, які сведчыць аб прынятым рашэнні выдаліць назіральнікаў з участку.
Пасля інцыдэнту на ўчастак прыбылі двое назіральнікаў ад місіі АБСЕ.
Намеснік старшыні выбаркама запатрабавала ад карэспандэнта БелаПАН пакінуць участак, нягледзячы на тое што большая частка членаў камісіі праігнаравалі дадатковае галасаванне па пытанні прысутнасці журналістаў. Варта заўважыць, што ўжо пасля гэтага для працы на ўчастку змаглі акрэдытавацца двое журналістаў, якія прыйшлі пазней за астатніх.
БелаПАН паведаміў пра інцыдэнт сакратару Цэнтрвыбаркама Мікалаю Лазавіку. Пытанне аб гэтай сітуацыі таксама будзе ўзнятае на чарговай прэс-канферэнцыі з удзелам кіраўніка ЦВК Лідзіі Ярмошынай.
