Жанчына напісала скаргу, у якой праз такое грубае парушэнне Выбарчага кодэксу прасіла ануляваць вынікі выбараў на гэтых участках.
«Я не ўваходжу ні ў якую сетку назірання. Але, калі атрымала два запрашэнні, на ўсялякі выпадак папрасіла вылучыць мяне на свой участак ад грамадскай арганізацыі. Каб мне не далі другі бюлетэнь, я б не пайшла глядзець падлік.
Да назірання за падлікам як назіральніцу мяне не падпусцілі. Сказалі адысці на тры метры, бо так патрабуе закон. Я дастала Выбарчы кодэкс і папрасіла паказаць мне пункт, дзе гэта напісана. Тады «камісар» сказаў: «Не мы гэта прыдумалі». Я пыталася, ці можна зірнуць калі не на бюлетэні, то хоць на паперкі з лічбамі, якія пішуць сябры камісіі і перадаюць сакратару. Старшыня камісіі забараніла.
Яшчэ заўважыла стосы бюлетэняў у скрыні з датэрміновым галасаваннем. Іх дакладна паклалі ў скрыню, а не кідалі ў шчыліну. Увесь стос «камісар» паклаў у адну кіпу. Нават ніводнага «сапсаванага» не зрабілі для падліку. Потым усе стосы змяшалі», — напісала Тамара Мацкевіч у фэйсбуку.
