З Мінска 14 кастрычніка стартуе першае кругасветнае падарожжа выключна жаночай каманды пад лозунгам «Сустрэнемся ў Беларусі!», паведамілі на прэс-канферэнцыі ў Мінску арганізатары праекта. Падарожніца Кацярына Бягун і дзве яе дачкі Аліса і Элізабет удзельнічаюць у народным праекце Begoonok, які мае на мэце расказаць свету пра Беларусь і запрасіць яе наведаць.
belarusbezgranic.by
Паводле слоў Кацярыны Бягун, удзельнічаючы ў гэтым праекце, яе сям`я вырашыла выканаць сваю даўнюю мару — пабываць у кругасветным падарожжы, а заадно стаць першай у свеце жаночай камандай, якая яго здзейсніць па ўсіх міжнародных правілах. Было вырашана, што ставіць задачу наведаць як мага больш краін няма сэнсу: не хопіць пашпарта на візы і штампы. Таму, сказала Бягун, трэба здзейсніць правільную кругасветку: наведаць усе пяць кантынентаў, прайсці па зямлі ці вадзе 40 тыс. кіламетраў, выкарыстоўваючы самалёт толькі для перамяшчэння з аднаго кантынента на другі, перасекчы ўсе мерыдыяны, двойчы перасекчы экватар, пабываць у двух процілеглых пунктах планеты. Акрамя таго, вандроўніцы хочуць пазнаёміцца з кожнай краінай знаходжання, а не проста адзначыцца там.
З Мінска каманда адправіцца праз усю Расію ў Манголію, далей у Кітай. Кітайскую візу жанчыны зрабілі загадзя, а астатнія збіраюцца атрымліваць па ходзе руху, тым самым даказваючы, што «з беларускім пашпартам у свеце няма межаў».
Далейшы маршрут: Тыбет, Непал, Індыя, В`етнам, Лаос і Камбоджа, дзе яны сустрэнуць Новы год. У 2017 годзе кругасветка працягнецца: Тайланд, Малайзія, Інданезія, Аўстралія, Паўднёвая Амерыка, ЗША, Іспанія. Бягун адзначыла, што ў працэсе планы могуць памяняцца, аднак вярнуцца ў Мінск каманда збіраецца ў чэрвені.
Адзін з партнёраў падарожжа, дырэктар рэкламнага агенцтва NEF TBWA Алег Раманаў паведаміў, што на ўсім працягу вандроўкі жанчынам абяцалі аказваць падтрымку праз консульствы ў розных краінах МЗС Беларусі і дэпартамент па грамадзянстве і міграцыі МУС.
«У дарозе вандроўніцы будуць сустракацца з беларускімі дыяспарамі, журналістамі, прадстаўніцтвамі беларускіх кампаній, будуць паказваць ролікі пра Беларусь, раздаваць сувеніры і запрашаць у госці, — сказаў ён. — Мы хочам выклікаць міжнародны рэзананс, каб гэта падарожжа прынесла бонусы Беларусі, каб як мага больш людзей даведалася пра яе і наведала. Цяпер, як ніколі, мы павінны заявіць пра сябе, пра тое, што мы — еўрапейская сучасная краіна з цікавымі, выдатнымі людзьмі — сціраем межы і павінны хутчэй інтэгравацца ў сусветную супольнасць, каб сюды прыязджалі людзі, прыходзілі інвестыцыі, беларускія тавары станавіліся ў свеце пэўным брэндам».
Раманаў адзначыў, што падарожжа — прыватная ініцыятыва, аднак любы ахвочы можа фінансава падтрымаць каманду. Для гэтага з 15 кастрычніка краўндфандынгавая платформа talaka.by аб`яўляе збор сродкаў. У продаж паступяць сувеніры з сімволікай праекта. Атрыманыя сродкі ад іх рэалізацыі пойдуць на падтрымку падарожнікаў і асвятленне праекта ў міжнародных выданнях.
Падчас падарожжа ўдзельніцы будуць весці дзённікі, здымаць ролікі. Відэасправаздачы, фотаматэрыялы будуць выкладвацца на сайце праекта «Беларусь без межаў» (belarusbezgranic.by) і ў сацыяльных сетках.
